AKP កំពង់ឆ្នាំង ថ្ងៃទី០២ ខែសីហា ឆ្នាំ២០២៥-- 

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅតែបន្តទទួលជំនួយពីសប្បុរសជននានាក្នុងខេត្ត នៅសាលាខេត្តកំពង់ឆ្នាំង ដើម្បីចុះទៅជួបសំណេះសំណាល និងសួរសុខទុក្ខ វីរកងទ័ពជួរមុខ និងបងប្អូនជនភៀសសឹកនៅខេត្តព្រះវិហារ នាថ្ងៃទី២ ខែសីហា ឆ្នាំ២០២៥ កម្មវិធីនេះមានការចូលរួមនិងឧបត្ថម្ភពីលោកជំទាវដោក សុទ្ធា ទីប្រឹក្សារាជរដ្ធាភិបាល លោក ធុច ផាត នាយកសាលាឃ្លាំងចំណេះភីអេស និងរួមទាំងក្រុមការងារជាច្រើននាក់ផងដែរ។

នៅក្នុងឱកាសនោះឯកឧត្តម ស៊ុន សុវណ្ណារិទ្ធិ បានមានប្រសាសន៍ថា នេះជាទឹកចិត្តអ្នកនៅខាងក្រោយ ជួយឧបត្ថម្ភដល់សមរភូមិមុខ ខណៈពេលដែលប្រទេសជាតិ កំពុងមានសង្គ្រាមជាមួយប្រទេសជិតខាង ដែលមានបំណងឈ្លានពានមកលើបូរណភាពទឹកដីនៃប្រទេសកម្ពុជា។ គ្រឿងឧបភោគបរិភោគ និងថវិកាទាំងនេះ វាតិចតួចក៏ពិតមែន ក៏ប៉ុន្តែក៏ចង់បង្ហាញអំពីការគាំទ្រ និងជួយសម្រាលដល់កងទ័ពជួរមុខ និងជនភៀសសឹកនៅព្រំដែន បានមួយគ្រាផងដែរ។ 

តន្ទឹមនឹងនេះឯកឧត្តមបានបន្តថា ពួកយើងខ្ញុំក៏ដូចជាបងប្អូនប្រជាពលរដ្ឋខ្មែរទាំងអស់ដែលបានបន្តគាំទ្រនិងផ្ដល់ការលើកទឹកចិត្តដល់វីរៈយុទ្ធជន វីរៈនគរបាលជាតិ ដែលកំពុងឈរជើងនិងធ្វើប្រតិបត្តិការយ៉ាងសកម្មក្នុងការការពារបូរណភាពទឹកដីខ្មែរ សូមបន្តនូវស្មារតីរួបរួមជាតិក្នុងនាមជាខ្មែរតែមួយ ដើម្បីការពារបូរណភាពទឹកដីរបស់យើង។ 

ជាមួយគ្នានេះដែរឯកឧត្តមអភិបាលខេត្តបានបញ្ជាក់ទៀតថា ការចូលរួមឧបត្ថម្ភគាំទ្រដល់កងទ័ពជួរមុខ និងជនភៀសសឹកនៅតំបន់ព្រំដែនកម្ពុជា-ថៃ។ រដ្ឋបាលខេត្តសូមអំពាវនាវដល់សប្បុរសជនទាំងអស់ ចូលរួមជាមួយរដ្ឋបាលខេត្តជួយបឧបត្ថម្ភជា ថវិកា សម្ភារប្រើប្រាស់ សម្ភារបរិក្ខាពេទ្យ គ្រឿងទេស ថ្នាំមូស និងគ្រឿងឧបភោគបរិភោគផ្សេងៗ តាមលទ្ធភាព ដើម្បីរួមចំណែកក្នុងការគាំទ្រ និងលើកទឹកចិត្តដល់កងទ័ពជួរមុខ ដែលកំពុងបំពេញបេសកកម្មដ៏ឧត្តុងឧត្តម ការពារបូរណភាពទឹកដី និងអធិបតេយ្យជាតិ និងឧបត្ថម្ភដល់ជនភៀសសឹក ដែលកំពុងត្រូវការជំនួយជាចាំបាច់៕

ដោយ ៖បៃ ស៊ីថុន