AKP បន្ទាយមានជ័យ ថ្ងៃទី០៤ ខែសីហា ឆ្នាំ២០២៥ -- គណៈប្រតិភូនៃមន្ទីរព័ត៌មានខេត្តបន្ទាយមានជ័យ ដឹកនាំដោយលោក សេក សុខុម ប្រធានមន្ទីរព័ត៌មានខេត្ត នាព្រឹកថ្ងៃទី០៤ ខែសីហា ឆ្នាំ២០២៥ បានចុះទៅសួរសុខទុក្ខ និងនាំយកថវិកា ក៏ដូចជាគ្រឿងឧបភោគបរិភោគមួយចំនួន ជូនដល់វីរកងទ័ពដែលកំពុងសម្រាកព្យាបាលរបួស នៅមន្ទីរពេទ្យបង្អែកកម្ពុជា-ជប៉ុន ស្ថិតក្នុងស្រុកមង្គលបូរី ខេត្តបន្ទាយមានជ័យ។

ក្នុងឱកាសដ៏មានអត្ថន័យនេះ លោក សេក សុខុម បានសម្តែងការគោរពដឹងគុណយ៉ាងជ្រាលជ្រៅចំពោះវីរភាពដ៏អង់អាចក្លាហានរបស់កងទ័ព ដែលបានពលីកម្លាំងកាយ កម្លាំងចិត្ត ក្នុងការប្រយុទ្ធ ការពារបូរណភាពទឹកដី និងសុវត្ថិភាពជូនប្រជាជន។ លោកបានមានប្រសាសន៍ថា “វីរភាពរបស់បងប្អូនកងទ័ព គឺជាគំរូវីរភាពដ៏ឧត្តុង្គឧត្តម ដែលកូនចៅជំនាន់ក្រោយគ្រប់រូបគួរតែចងចាំ និងដកស្រង់យកមកធ្វើជាគំរូ។ បងប្អូនបានលះបង់យ៉ាងធំធេង ដើម្បីបុព្វហេតុជាតិមាតុភូមិ និងប្រជាជន ដែលការលះបង់នេះបាននាំមកនូវសុខសន្តិភាព និងស្ថិរភាពដល់ប្រទេសជាតិ”។

លោកប្រធានមន្ទីរព័ត៌មានខេត្តបន្ទាយមានជ័យក៏បានថ្លែងអំណរគុណចំពោះក្រុមគ្រូពេទ្យទាំងអស់ ដែលបានខិតខំប្រឹងប្រែងព្យាបាល និងផ្តល់សេវាថែទាំយ៉ាងយកចិត្តទុកដាក់ដល់កងទ័ពដែលរងរបួស។ ក្នុងនាមថ្នាក់ដឹកនាំ និងមន្ត្រីរាជការទាំងអស់នៃមន្ទីរព័ត៌មានខេត្តបន្ទាយមានជ័យ លោកបានជូនពរដល់វីរកងទ័ពទាំងអស់ដែលកំពុងសម្រាកព្យាបាលឱ្យឆាប់ជាសះស្បើយ និងមានសុខភាពល្អបរិបូរណ៍ ដើម្បីត្រឡប់ទៅបំពេញភារកិច្ចការពារជាតិបន្តទៀត។

ដំណើរចុះសួរសុខទុក្ខនេះ គឺជាការបង្ហាញពីការយកចិត្តទុកដាក់ និងការដឹងគុណរបស់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្ត ទៅកាន់កងទ័ពទាំងអស់ ដែលបានលះបង់ដោយមិនគិតពីជីវិតផ្ទាល់ខ្លួន ដើម្បីរក្សាបាននូវសុខសន្តិភាព និងភាពសុខដុមរមនាក្នុងសង្គម៕

ដោយ ឈុន សារ៉ាត