AKP ព្រះសីហនុ ថ្ងៃទី០៤ ខែសីហា ឆ្នាំ២០២៥-- លោកឧកញ៉ា តាន់ តាត់ ប្រធានសភាពាណិជ្ជកម្មខេត្តព្រះសីហនុ ដឹកនាំសមាជិក សមាជិកានៃសភាពពាណិជ្ជកម្មខេត្តព្រះសីហនុ នាំយកអំណោយជាគ្រឿងឧបភោគ បរិភោគ និងសម្ភារប្រើប្រាស់ឧបត្តមជូនកងទ័ពមួជួរមុខ និងជនភៀសសឹកនៅខេត្តឧត្តរមានជ័យ និងខេត្តព្រះវិហារ ដោយពិធីប្រគល់ និងទទួលប្រព្រឹត្តទៅក្រោមអធិបតីភាពឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នារសៀលថ្ងៃចន្ទទី០៤ ខែសីហា ឆ្នាំ២០២៥។

លោកឧកញ៉ា តាន់ តាត់ ប្រធានសភាពាណិជ្ជកម្មខេត្តព្រះសីហនុ បានឱ្យដឹងថា អំណោយជាគ្រឿងឧបភោគ បរិភោគ និងសម្ភារទាំងអស់នេះ គឺបានមកពីការចូលរួមរបស់សមាជិក សមាជិការនៃសភាពាណិជ្ជកម្មខេត្តព្រះសីហនុ ទោះបីអំណោយទាំងអស់នេះវាមានចំនួនតិចក្តី ក៏ប៉ុន្តែនេះជាទឹកចិត្តរបស់បងប្អូនសប្បុរសធម៌នៃសភាពាណិជ្ជកម្មរបស់យើង ដែលពួកគាត់ជាសមរភូមិក្រោយផ្សារភ្ជាប់ជាមួយនឹងសមរភូមិជួរមុខជានិច្ច។ ថ្មីត្បិតយើងមិនបានចូលសមរភូមិមុខក៏ពិតមែន ប៉ុន្តែពួកយើងទាំងអស់គ្នានៅសមរភូមិក្រោយនឹងខិតខំកៀរគររកជំនួយមនុស្សធម៌ ដើម្បីផ្តល់ជូនដល់វីរកងទ័ពរបស់យើងនៅសមរភូមិមុខ និងជនភៀសសឹករបស់យើងនៅទិសខេត្តឧត្តរមានជ័យ និងខេត្តព្រះវិហារ ដែលកំពុងត្រូវការជំនួយមនុស្សធម៌។

ក្នុងឱកាសនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បានថ្លែងអំណរគុណចំពោះសមាជិក សមាជិកានៃសភាពាណិជ្ជកម្មខេត្តព្រះសីហនុ បានមូលមតិគ្នានាំយកអំណោយជាគ្រឿងឧបភោគ បរិភោគ និងសម្ភារប្រើប្រាស់មួយចំនួន ដើម្បីផ្តល់ជូនរដ្ឋបាលខេត្តព្រះសីហនុចែកជូនទៅដល់បងប្អូនវីរជនកងទ័ពនៅសមរភូមិមុខ និងជនភៀសសឹករបស់យើងដែលពួកគាត់កំពុងត្រូវការជំនួយមនុស្សធម៌ពីបងប្អូនសប្បុរសជន។ ទន្ទឹមនឹងការជួយសមរភូមិមុខ យើងក៏ត្រូវគិតគូរពីសមរភូមិក្រោយផងដែរ មានដូចជាកងកម្លាំងរបស់យើងដែលកំពុងត្រៀមចេញទៅកាន់សមរភូមិមុខ។

ជាមួយគ្នានោះ ឯកឧត្តមអភិបាលខេត្តព្រះសីហនុក៏បានជូនពរដល់សមាជិក សមាជិកាសភាពាណិជ្ជកម្មទាំងអស់មានសុខភាពល្អគ្រប់ក្រុមគ្រួសារ និងទទួលបានជ័យជម្នះលើមុខជំនួញរៀងៗខ្លួន និងបានបញ្ជាក់ថា រដ្ឋបាលខេត្តក៏បាននាំយកអំណោយមនុស្សធម៌មានដូចជាគ្រឿងឧបភោគបរិភោគ សម្ភារប្រើប្រាស់ និងថវិកាឧបត្ថមជូនវីរកងទ័ពជួរមុខ និងជនភៀសសឹកកាលពីចុងខែកក្កដា ឆ្នាំ២០២៥កន្លងមក ហើយអំណោយទាំងអស់នេះ និងបន្តយកទៅឧបត្ថម្ភជូនដល់វីរកងទ័ពជួមុខ និងជនភៀសសឹករបស់យើងបន្តទៀតនៅពេលខាងមុខ។

សូមបញ្ជាក់ថា អំណោយរបស់សភាពាណិជ្ជកម្មខេត្តព្រះសីហនុប្រគល់ជូនរដ្ឋបាលខេត្តព្រះសីហនុ មានដូចជា អង្ករ ៨តោន ទឹកត្រី ២០០យួរ ទឹកស៊ីអ៊ីវ ១០០យួរ ទឹកដោះគោប្រអប់ ១០០កេស ទឹកដោះគោខាប់ ៣០កេស នំប្រៃ ៣០កេស ត្រីកាម៉ុង ៥០ជាល សាច់ក្រក ២៥គីឡូក្រាម ត្រីងៀត ២៥គីឡូក្រាម ផ្អកត្រីប្រា ២០គីឡូក្រាម ប្រហុក ២០គីឡូក្រាម មុង១០០ អាវភ្លៀង១០០ តង់ ៨x១០ម៉ែត្រ ១៣០ ថ្នាំពេទ្យ (First Aid និងថ្នាំសាមញ្ញ ១០០កញ្ចប់) សរុបទឹកប្រាក់ចំនួន ៣២ ៦៩១ដុល្លាអាមេរិក៕

ដោយ ងូ សុមុនី