AKP កណ្ដាល ថ្ងៃទី០៦ ខែសីហា ឆ្នាំ២០២៥-- មន្ទីរពាណិជ្ជកម្មខេត្តកណ្ដាល នៅថ្ងៃទី០៦ ខែសីហា ឆ្នាំ២០២៥ បានរៀបចំសិក្ខាសាលាផ្សព្វផ្សាយការកំណត់អត្តសញ្ញាណ និងការផ្សព្វផ្សាយផលិតផលសក្តានុពលកម្ពុជា ដោយបានការអញ្ជើញចូលរួមជាអធិបតីពី លោក ប៊ុន ផេង អភិបាលរងខេត្តកណ្ដាល និងលោក តាន់ យុវរដ្ឋ អគ្គនាយករងជំរុញពាណិជ្ជកម្ម នៃក្រសួងពាណិជ្ជកម្ម ព្រមទាំងមានការចូលរួមអាជ្ញាធរក្រុង-ស្រុក មន្ទីរពាក់ព័ន្ធ ម្ចាស់អាជីវកម្ម សហគ្រាស និងសិប្បកម្មជាច្រើនរូបផងដែរ។

ថ្លែងក្នុងសិក្ខាសាលានេះ លោក ប៊ុន ផេង បានជំរុញដល់ម្ចាស់អាជីវកម្ម សហគ្រាសទាំងអស់ ត្រូវខិតខំពង្រឹង គុណភាព សុវត្ថិភាព ការវេចខ្ចប់ប្រកបដោយអនាម័យ ការដាក់ស្លាកថ្លៃផលិតឱ្យត្រូវតាមបទដ្ឋានបច្ចេកទេស និងតាមតម្រូវការរបស់អ្នកប្រើប្រាស់ជាមួយនឹងតម្លៃល្អ ដើម្បីអាចប្រកួតប្រជែងជាមួយផលិតផលនាំចូល។ ខេត្តកណ្ដាលជាខេត្តមួយដែលមានសក្តានុពលខ្ពស់ក្នុងការទទួលគម្រោងវិនិយោគក្នុងវិស័យកសិកម្ម ឧស្សាហកម្ម នគរូបនីយកម្ម សំណង់ ទេសចរណ៍ សេវាកម្ម និងបណ្តាវិស័យផ្សេងៗទៀត។ គោលដៅអភិវឌ្ឍន៍ក្នុងខេត្តកណ្តាល គឺខិតខំទាក់ទាញវិនិយោគក្នុងស្រុក និងក្រៅស្រុក មកវិនិយោគក្នុងខេត្ត ដើម្បីបង្កើតការងារជូន ប្រជាពលរដ្ឋក្នុងខេត្តមានការងារធ្វើ បង្កើនប្រាក់ចំណូលនិងជីវភាពសមរម្យ ពង្រឹងការផ្តល់សេវាសាធារណៈ ជូនប្រជាពលរដ្ឋឱ្យកាន់តែមានប្រសិទ្ធភាព និងទាន់ពេលវេលា។ ផលិតផលសក្កានុពលរបស់ខេត្តកណ្តាលមានចំនួន ៧មុខ រួមមាន ចម្លាក់ប្រាក់ ស្ពាន់ តម្បាញសូត្រ តម្បាញក្រមា កន្ទេលកក់ ឆៃប៉ូវ កន្ត្រកធ្វើពីវល្លិ៍ថ្នឹង-ស្លឹកទ្រាំង មួក ផ្ចិត ធ្វើពីស្លឹកត្នោត ផលិតផលទាំងនេះបាន និងកំពុងចរាចរលើទីផ្សារ និងជំរុញការផ្សព្វផ្សាយ តាមរយៈការពិព័រណ៍ពាណិជ្ជកម្មក្នុងនិងក្រៅប្រទេស យុទ្ធនាការទិញផលិតផលខ្មែរ វេទិកាផ្សេងៗ។ តួយ៉ាងសិក្ខាសាលានាពេលនេះក៏បានដាក់តាំងបង្ហាញផលិតផលទាំងនេះផងដែរ ក្នុងគោលបំណងកំណត់នូវអត្តសញ្ញាណ និងផ្សព្វផ្សាយជូនសាធារណជនបានស្គាល់ និងដើម្បីជំរុញផលិតផលទាំងនេះចូលទីផ្សារក្នុងប្រទេសកម្ពុជាឱ្យបានកាន់តែទូលំទូលាយ និងការនាំចេញទៅកាន់ទីផ្សារអន្តរជាតិ។ នៅក្នុងខេត្តរបស់យើងផលិតផលដែលទទួលស្គាល់ពីគណៈកម្មាធិការជាតិជំរុញចលនាភូមិ១ ផលិតផល១ នៅឆ្នាំ២០២៣ មានសមាជិកចំនួន៣៦ និងឆ្នាំ២០២៤ ចំនួន៤២សមាជិក ក្នុងនោះផលិតផល រួមមាន៖ ផ្លែឈើ មានមៀន ចេកពងមាន់ បន្លែ មានគុយឆាយ ស្លឹកងប់ ត្រី  មានត្រីពោធិ៍ ឆ្អិន ឆ្តោ មាន់ស្រែ ទឹកក្រូច ក្រមួនលាប គុយទាវសរសៃ ទឹកឃ្មុំ ទឹកត្រី ចម្លាក់ប្រាក់-ស្ពាន់ រួបត្រី រូបសត្វ សម្ភារសក្ការៈចម្រុះ ស្មុកស្លឹកត្នោត សំបុក្រទឹកមាត់ត្រចៀកកាំ និងកន្ត្រកវល្លិ៍ថ្លឹង។

លោក តាន់ យុវរដ្ឋ បានលើកទឹកចិត្តដល់បងប្អូនជាម្ចាស់ផលិតករ សិប្បកម្ម អាជីវកម្ម ពាណិជ្ជករ កសិករ អ្នកផ្គត់ផ្គង់ និងដៃគូពាក់ព័ន្ធទាំងអស់ ត្រូវប្រើប្រាស់ឱ្យអស់លទ្ធភាព និងសមត្ថភាពរបស់ខ្លួនក្នុងការផ្លាស់ប្តូរបទពិសោធន៍គ្នាក្នុងការផលិត  និងការស្វែងរកអតិថិជន សម្រាប់លក់ផលិតផលរបស់ខ្លួន។ ជាពិសេសយើងទាំងអស់គ្នា ត្រូវតែចូលរួមគាំទ្រផលិតផលខ្មែរដើម្បីអភិវឌ្ឍសេដ្ឋកិច្ចជាតិ និងចូលរួមក្នុងការកាត់បន្ថយភាពក្រីក្រនៅកម្ពុជា៕

ដោយ ណយ នឿន (ប្រភព៖ រដ្ឋបាលខេត្តកណ្តាល)