AKP កណ្ដាល ថ្ងៃទី០៦ ខែសីហា ឆ្នាំ២០២៥-- នៅមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀនខេត្តកណ្តាល ស្ថិតនៅឃុំព្រែគយ ស្រុកស្អាង នៅថ្ងៃទី០៦ ខែសីហា ឆ្នាំ២០២៥ បានរៀបចំទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦ ខែមិថុនា ឆ្នាំ២០២៥ ក្រោមប្រធានបទ “រួមគ្នា បង្ការ ទប់ស្កាត់ និងកាត់ផ្តាច់ឬសគល់នៃបញ្ហាគ្រឿងញៀននៅកម្ពុជា” ក្រោមអធិបតីភាពឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការ ក្រសួងយុត្តិធម៌ ឯកឧត្ដម នូ សាខន ប្រធានក្រុមប្រឹក្សាខេត្តកណ្តាល និងឯកឧត្ដម គួច ចំរើន អភិបាលខេត្តកណ្ដាល។

ឯកឧត្តម លាង ស្រេង ព្រះរាជអាជ្ញានៃអយ្យការអមសាលាដំបូងខេត្តកណ្តាល បានលើកឡើងក្នុង ទិវាអន្តរជាតិប្រយុទ្ធប្រឆាំងគ្រឿង ថា ការដុតបំផ្លាញវត្ថុតាងគ្រឿងញៀន សារធាតុផ្សេងៗ និងសម្ភារៈពាក់ព័ន្ធបទល្មើសគ្រឿងញៀន តាមសេចក្តីសម្រេច និងតាមអំណាចសាលក្រម របស់សាលាដំបូងខេត្តកណ្តាល និងសាលាដំបូងរាជធានីភ្នំពេញ ក្នុងនោះប្រមូលបានពី សាលាដំបូងខេត្តកណ្តាល សរុបចំនួន ២០៩ សំណុំរឿង និងសាលាដំបូងរាជធានីភ្នំពេញ សរុបចំនួន ១៣៣ សំណុំរឿង រួមមាន៖ សារធាតុញៀនគ្រប់ប្រភេទ, សារធាតុផ្សំគ្រប់ប្រភេទ និងសម្ភារពាក់ព័ន្ធការផលិតកែច្នៃ ការជួញដូរ និងការប្រើប្រាស់គ្រឿងញៀន ដែលអាចដុតបំផ្លាញចោលបាន សរុបរួមមានចំនួន ៦ ៣៥៧ ៤១១,១២ ក្រាម។

ឯកឧត្ដម គួច ចំរើន អភិបាលខេត្តកណ្ដាល បានមានប្រសាសន៍ថា រាជរដ្ឋាភិបាល នីតិកាលទី៧ នៃរដ្ឋសភា ឈរលើគោលការណ៍ដ៏រឹងមាំមុតស្រួច ក្នុងការប្រយុទ្ធប្រឆាំងគ្រឿងញៀន ដើម្បីសម្រេចបាននូវបរិស្ថានគ្របដណ្តប់ចម្បង នៃយុទ្ធសាស្ត្របញ្ចកោណ ដំណាក់កាលទី១ គឺការបន្តពង្រឹងសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ ដែលជាបុរេលក្ខខណ្ឌមិនអាចខ្វះបាន សម្រាប់ការអភិវឌ្ឍជាតិ។ ក្នុងន័យនេះ គណៈកម្មាធិការត្រួតពិនិត្យគ្រឿងញៀនខេត្តកណ្តាល បានអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដោយបានបំផុសចលនាឱ្យមន្ត្រីអនុវត្តច្បាប់ទូទាំងខេត្ត ដៃម្ខាងធ្វើការស្រាវជ្រាវចាប់ បង្ក្រាបជនល្មើស និងដៃម្ខាងទៀតធ្វើការផ្សព្វផ្សាយអប់រំ អំពីបញ្ហាគ្រឿងញៀន ឱ្យបានទូលំទូលាយ គ្រប់មជ្ឈដ្ឋាន និងសហគមន៍ របស់ខ្លួនទទួលខុសត្រូវ។ បានធ្វើការអំពាវនាវឱ្យគ្រប់អ្នកពាក់ព័ន្ធ និងកងកម្លាំងអនុវត្តច្បាប់ទាំងអស់ អនុវត្តយ៉ាងម៉ឺងម៉ាត់នូវទិសស្លោកជាតិ ៣កុំ ១រាយការណ៍  កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍ ផ្តល់ព័ត៌មានដល់សមត្ថកិច្ច គ្រប់ករណីបទល្មើសគ្រឿងញៀន។ បានធ្វើសកម្មភាពផ្សព្វផ្សាយ អប់រំ លើកកម្ពស់ការយល់ដឹងពីគ្រឿងញៀន តាមគ្រប់រូបភាព គ្រប់មធ្យោបាយ តាមបណ្តាក្រុង-ស្រុកទូទាំងខេត្ត។ បានចងបដាពាក្យស្លោក និងចែកខិតប័ណ្ណ ផ្សព្វផ្សាយអំពីបញ្ហាគ្រឿងញៀន និង App NoDrug។

មានប្រសាសន៍ក្នុងទិវាអន្តរជាតិប្រយុទ្ធប្រឆាំងគ្រឿងនេះដែរ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការ ក្រសួងយុត្តិធម៌ បានមានប្រសាសន៍ថា ទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦ ខែមិថុនា ឆ្នាំ២០២៥ ក្រោមប្រធានបទ “រួមគ្នា បង្ការ ទប់ស្កាត់ និងកាត់ផ្តាច់ឬសគល់នៃបញ្ហាគ្រឿងញៀននៅកម្ពុជា” ជាសក្ខីភាពបញ្ជាក់យ៉ាងច្បាស់នូវការយកចិត្តទុក ដាក់ខ្ពស់ចំពោះសកម្មភាព ប្រយុទ្ធប្រឆាំង បង្ការទប់ស្កាត់ និងកាត់ផ្តាច់ឫសគល់ នៃបញ្ហាគ្រឿងញៀន គ្រប់ប្រភេទ នៅកម្ពុជា ឱ្យដំណើការទៅមុខបានដោយរលូន និងទទួលលទ្ធផលល្អប្រសើរ ជាពិសេស គឺជាការឆ្លើយតប យ៉ាងច្បាស់លាស់ និងមោះមុតចំពោះយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដោយអនុលោមតាមស្មារតី នៃផែនការលេខ ០១ ផក ចុះថ្ងៃទី០៧ ខែកុម្ភៈ ឆ្នាំ២០២៥ ស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១០ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តមបណ្ឌិតបានស្នើដល់គ្រប់ភាគីពាក់ព័ន្ធ បន្តស្មារតីរួម និងចលនាជាតិមួយក្នុងការចូលរួមផ្សព្វផ្សាយ អប់រំ ឱ្យបានទូលំទូលាយដល់គ្រប់មជ្ឈដ្ឋានអំពីផលប៉ះពាល់និងវិនាសកម្មនៃគ្រឿងញៀន និងបង្កើនភាពជឿជាក់សម្រាប់រាល់ប្រជាពលរដ្ឋកម្ពុជាគ្រប់រូបថា «មួយជីវិតគឺមិនពាក់ព័ន្ធនឹងគ្រឿងញៀន»។ លើកទឹកចិត្តប្រជាពលរដ្ឋទាំងអស់ ជាពិសេស យុវជន និងយុវនារី ទាញយកនិងប្រើប្រាស់កម្មវិធី ទូរស័ព្ទដៃ NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀន ដែលជាបណ្ដុំនៃមេរៀន សារអប់រំ ព័ត៌មាន សេវាព្យាបាល និងស្តារនីតិសម្បទា ជាពិសេស ជាមធ្យោបាយរាយការណ៍ដ៏រហ័សនិងសម្ងាត់អំពីករណីប្រើប្រាស់ និងចែកចាយគ្រឿងញៀនក្នុងសហគមន៍។ ការប្រើប្រាស់ App NoDrug គឺស្មើនឹងចូលរួមជាមួយរាជរដ្ឋាភិបាលក្នុងការ ប្រយុទ្ធប្រឆាំងគ្រឿងញៀននៅកម្ពុជា៕

ដោយ ណយ នឿន (ប្រភព៖ រដ្ឋបាលខេត្តកណ្តាល)