AKP កំពង់ធំ ថ្ងៃទី២៦ ខែសីហា ឆ្នាំ២០២៥-- ខណ្ឌរដ្ឋបាលជលផលខេត្តនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ សហការជាមួយរដ្ឋបាលខេត្ត បានរៀបចំប្រារព្ធពិធីលែងបង្កងប្រមាណ៧ម៉ឺន និងត្រីមេពូជ៦គីឡូក្រាមដើម្បីអបអរសាទរទិវាមច្ឆជាតិ ១កក្កដា ឆ្នាំ២០២៥នៅស្ទឹងព្រៃប្រស់ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី២៦ ខែសីហា ឆ្នាំ២០២៥ ក្រោមអធិបតីភាពឯកឧត្តម នួន ផារ័ត្ន អភិបាលខេត្តកំពង់ធំ និងលោកជំទាវ និងមានការអញ្ជើញចូលរួមពីលោកអភិបាលរងខេត្ត លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ប្រធានមន្ទីរជុំវិញខេត្ត មន្ត្រីខណ្ឌរដ្ឋបាលជលផល មន្ត្រីរដ្ឋបាលស្រុក ការិយាល័យ អង្គភាពជុំវិញស្រុក ក្រុមប្រឹក្សាឃុំ មេភូមិ ប្រជាពលរដ្ឋ លោកគ្រូ-អ្នកគ្រូនិងសិស្សានុសិស្ស សរុបប្រមាណជា៣០០នាក់។

លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានលើកឡើងថា ពិធីលែងកូនបង្កងនៅថ្ងៃនេះគឺត្រូវលែងចូលក្នុងស្ទឹងព្រៃប្រស់សម្រាប់បង្កើនផលបង្កងនៅទីនេះឱ្យសំបូរឡើងវិញ ដើម្បីទុកជាប្រយោជន៍ជូនបងប្អូននៅទីនេះប្រើប្រាស់។ រក្សាទុកនូវបង្កងមេពូជ សម្រាប់បន្តពូជ និងទាក់ទាញភ្ញៀវទេសចរ។ ជលផលគឺជាអនុវិស័យធំទី២ បន្ទាប់ពីអនុវិស័យដំណាំជាម្ហូបអាហារចាំបាច់ដែលយើងមិនអាចខ្វះបាន។ ទន្ទឹមនឹងនេះលោកបានអំពាវនាវឱ្យប្រជាពលរដ្ឋ អាជ្ញាធរដែនដីចូលរួមថែរក្សាការពារធនធានជលផល ទប់ស្កាត់បទល្មើសផ្សេងៗដែលច្បាប់ហាមឃាត់ ដូចជា ឆក់ត្រី នៅឧបករណ៍ស្បៃមុងជាដើម ដូចពាក្យថា ធនធានជលផលជារបស់យើងទាំងអស់គ្នា យើងចិញ្ចឹមបង្កង បង្កងចិញ្ចឹមយើង។

ឯកឧត្តម នួន ផារ័ត្ន បានមានប្រសាសន៍ថា ពិធីលែងកូនបង្កងនេះគឺអនុវត្តតាមលំអានដែលនៅក្នុងទិវាមជ្ឆជាតិ ជាគោលការណ៍អាទិភាពដែលរាជរដ្ឋាភិបាលកំពុងតែយកចិត្តទុកដាក់។ ទិវាមច្ឆជាតិនេះគឺជាទិវាដែលដាស់ស្មារតី ប្រជាពលរដ្ឋគ្រប់មជ្ឈដ្ឋាន ចងចាំអំពីមច្ឆានេះតែម្ដង។ បង្កង និងត្រីជាម្ហូបអាហារ ជាបញ្ហាសំខាន់សម្រាប់ជាស្បៀងមួយរបស់មនុស្សជាតិមិនថាជាតិណានោះទេគឺត្រូវការបង្កង និងត្រីសម្រាប់ធ្វើជាស្បៀង បានន័យថាស្បៀងមិនសំដៅលើស្រូវតែមួយមុខនោះទេ គឺសំដៅលើចំណីអាហារដែលយើងអាចទទួលទានបាន រួមទាំងបន្លែបង្ការផងដែរ។ ពិសេសនៅក្នុងយុទ្ធសាស្ត្របច្ចកោណដំណាក់កាលទី១ របស់សម្ដេចមហាបវរធិបតី ហ៊ុន ម៉ាណែត គឺគោលការណ៍ អភិរក្ស និងអភិវឌ្ឍបង្កង និងត្រី។

ឯកឧត្តម នួន ផារ័ត្ន បានធ្វើការផ្តាំផ្ញើថា ដើម្បីអភិរក្សធនធានធម្មជាតិមច្ឆជាតិ យើងត្រូវហូបបង្កង និងត្រី កុំឱ្យផុតពូជ ត្រូវការពារមេបង្កង មេត្រីយើងមានតំបន់អភិរក្សត្រីនៅតាមទន្លេ  ស្ទឹង បឹង អូរ សូមកុំប៉ះពាល់វា ទុកសម្រាប់ធ្វើមេពូជបន្តទៀត និងសូមចូលរួមកុំប្រើប្រាស់ឧបករណ៍ណាដែលហាមឃាត់ បំផ្លាញមច្ឆជាតិ និងរដូវត្រីពងកូន  ជាពិសេសសូមកុំបំផ្លាញព្រៃលិចទឹក ព្រោះវាជាជម្រកនៃបង្កង និងត្រីពងកូន ត្រូវគោរពតាមច្បាប់ជលផលដែលបានចែង៕

ដោយ ស៊ុម វណ្ណា