AKP ភ្នំពែញ ថ្ងៃទី១២ ខែកញ្ញា ឆ្នាំ២០២៥--ឯកឧត្តមរដ្ឋមន្រ្តីក្រសួងធនធាន ទឹកនិងឧតុនិយមបានបង្ហាញនូវជំនឿយ៉ាងមុតមាំចំពោះការគាំទ្រ និងភាពជាដៃគូរបស់ធនាគារអភិវឌ្ឍន៍អាស៊ី ដើម្បីជួយដល់ប្រទេសកម្ពុជាឱ្យមានការអភិវឌ្ឍលើគ្រប់វិស័យកាន់តែខ្លាំងថែមទៀត ជាពិសេសវិស័យធនធានទឹក និងឧតុនិយម ដើម្បីឆ្លើយតបទៅនឹងការប្រែប្រួលអាកាសធាតុ។

ឯកឧត្តមរដ្ឋមន្ត្រី ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានថ្លែងបែបនេះក្នុងឱកាសដែលឯកឧត្តម   អនុញ្ញាតឱ្យប្រតិភូក្រុមបេសកកម្មធនាគារអភិវឌ្ឍន៍អាស៊ី(ADB) ដឹកនាំដោយលោក Anthony Gill ប្រធានផ្នែកប្រតិបត្តិការប្រចាំប្រទេស និងសហការី ដើម្បីចូលជួបសម្ដែងការគួរសម និងពិភាក្សាការងារ នៅទីស្ដីការក្រសួងធនធានទឹក និងឧតុនិយមនាព្រឹកថ្ងៃសុក្រ ទី១២ ខែកញ្ញា ឆ្នាំ២០២៥ ។

ឯកឧត្តមរដ្ឋមន្ត្រីបានលើកឡើងថា  ធនាគារអភិវឌ្ឍន៍អាស៊ី(ADB) កន្លងមកបានចូលរួមចំណែកយ៉ាងសកម្មក្នុងការអភិវឌ្ឍសង្គមសេដ្ឋកិច្ចកម្ពុជា ក៏ដូចជាកិច្ចសហប្រតិបត្តិការក្នុងការធ្វើទំនើបកម្មវិស្វកម្មគ្រប់ជ្រុងជ្រោយហេដ្ឋារចនាសម្ព័ន្ធគ្រប់គ្រងវិស័យធនធានទឹក និងឧតុនិយម ដែលធានាបាននូវសន្តិសុខទឹក ព្រមទាំងការផ្គត់ផ្គង់ទឹកជូនដល់គ្រប់វិស័យ ជាពិសេសដល់អ្នកទទួលផលដែលជាស្ត្រី ក្រុមារ និងមនុស្សចាស់ ក្នុងបរិបទនៃការប្រែប្រួលអាកាសធាតុ និងការឡើងកម្តៅនៃភពផែនដី។

ឯកឧត្តមរដ្ឋមន្រ្តី ក៏បានបង្ហាញនូវជំនឿយ៉ាងមុតមាំចំពោះការគាំទ្រ និងភាពជាដៃគូរបស់ធនាគារអភិវឌ្ឍន៍អាស៊ី ដើម្បីជួយដល់ប្រទេសកម្ពុជាឱ្យមានការអភិវឌ្ឍលើគ្រប់វិស័យកាន់តែខ្លាំងថែមទៀត ជាពិសេសវិស័យធនធានទឹក និងឧតុនិយម ដើម្បីឆ្លើយតបទៅនឹងការប្រែប្រួលអាកាសធាតុ និងបានបញ្ជាក់ពីជំហរក្នុងការបន្តពង្រឹង និងពង្រីកកិច្ចសហប្រតិបត្តិការ ដើម្បីជំរុញការគ្រប់គ្រង និងការអភិវឌ្ឍវិស័យធនធានទឹកឱ្យកាន់តែមានប្រសិទ្ធភាព និរន្តរភាព និងបរិយាបន្ន សម្រាប់ការអភិវឌ្ឍ និងការរីកលូតលាស់នៃសេដ្ឋកិច្ចកម្ពុជា ប្រកបដោយចីរភាព។

សូមបញ្ជាក់ថា ក្រសួងធនធានទឹក និងឧតុនិយម បាននិងកំពុងអនុវត្តគម្រោងវិនិយោគក្រោមហិរញ្ញប្បទានរបស់ធនាគារអភិវឌ្ឍន៍អាស៊ី(ADB) ចំនួនពីរគឺ៖ 
១-គម្រោងកែលម្អវិស័យធារាសាស្ត្រកសិកម្ម(TAIP) 
២-គម្រោងគ្រប់គ្រងធនធានទឹកចម្រុះ(IWRM)៕

ដោយ៖ ពេជ្រ សំអឿន,ប្រភព៖ក្រសួងធនធានទឹក និងឧតុនិយម