AKP សៀមរាប ថ្ងៃទី១៥ ខែកញ្ញា ឆ្នាំ២០២៥-- លោកជំទាវ ហ៊ុន ម៉ាលី  និងលោកជំទាវ  ឌី សុទីឃាយុកោ ហ៊ុន ម៉ានិត អមដំណើរដោយលោកជំទាវ ទាង អេង ទៀសីហា ជាមួយលោកជំទាវជាច្រើននាក់ទៀត នៅថ្ងៃទី១៤ ខែ កញ្ញា ឆ្នាំ២០២៥នេះ បាននាំយកទេយ្យទាន រួមនិងបច្ច័យផ្ទាល់ខ្លួន និងរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជាចូលរួមកាន់វេនបិណ្ឌ៧ជាមួយបងប្អូនប្រជាពលរដ្ឋនិងពុទ្ធបរិស័នៅវត្តបារាយមហាននទីរតនារាម ហៅវត្តស្វាយរមៀត ដែលស្ថិតនៅភូមិបន្ទាយឈើ សង្កាត់ទឹកវិលក្រុងសៀមរាប ដើម្បីឧទ្ទិសកុសលផលបុណ្យជូនជីដូន ជីតា និងញាតិការទាំង៧សន្តាន តាមទំនៀមទម្លាប់ប្រពៃណីព្រះពុទ្ធសាសនានិងឧទ្ទិសកុសលជូនចំពោះវិញ្ញាណក្ខន្ធវីវកងទ័ពដែលបានពលីជីវិតក្នុងបុព្វហេតុជាតិ ការពារបូរណភាពទឹកដី ក្នុងអំឡុងពេលនៃជម្លោះព្រំដែន កម្ពុជា-ថៃផងដែរ។

ព្រះសច្ចានុបាល នឿម វុទ្ធី ព្រះរាជាគណៈកិត្តិយស និងជាព្រះគ្រូចៅអធិការវត្តស្វាយរមៀត បានមានថេរដីកាថា ពិធីបុណ្យកាន់បិណ្ឌនិងភ្ជុំបិណ្ឌ ជាបុណ្យប្រពៃណី ព្រះពុទ្ធសាសនាខ្មែរដ៏សំខាន់។ បុណ្យកាន់បិណ្ឌ និងភ្ជុំបិណ្ឌប្រារព្ធឡើងចាប់ពីថ្ងៃ១រោច ដល់ថ្ងៃ១៥រោច ខែភទ្របទ ជារៀងរាល់ឆ្នាំ ក្នុងគោលបំណងបង្កើនសាមគ្គីភាពរវាងបុគ្គល គ្រួសារ និងសង្គម បញ្ជាក់ឱ្យឃើញពីការសម្បូរហូរហៀរនៃភោគផលធញ្ញាហារផ្សេងៗរបស់ប្រជាជនខ្មែរ ផ្គត់ផ្គង់ព្រះសង្ឃក្នុងព្រះវស្សា។ សម្តែងនូវភាពកតញ្ញូកតវេទី។ ដាស់តឿនស្មារតីដល់មនុស្សគ្រប់រូបកុំឱ្យមានសេចក្តីប្រមាទក្នុងការធ្វើអំពើបាបនានា។ ឧទ្ទិសមហាកុសលជូនដល់វិញ្ញាណក្ខន្ធនៃបុព្វការីជន និងពពួកញាតិ។ សន្សំនូវមហាកុសលទុកជាទីពឹងរបស់ខ្លួន និងបន្តថែរក្សាបុណ្យប្រពៃណីព្រះពុទ្ធសាសនាខ្មែរយើងឱ្យតាំងនៅស្ថិតស្ថេរអស់កាលជាយូរអង្វែង។ 

ក្នុងពិធីកាន់បិណ្ឌនោះផងដែរ លោកជំទាវ ហ៊ុន ម៉ាលី និងលោកជំទាវ ឌី សុទីឃាយុកោ ហ៊ុន ម៉ានិត បានចែកជូនអំណោយនិងថវិកាដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់យាយ ជីតាជី និងពុទ្ធបរិស័ទចូលរួមកាន់វេនបិណ្ឌប្រមាណជាង១០០នាក់ផងដែរ៕

ដោយ ឃុត សៅ