AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥-- សូមប្រជាពលរដ្ឋខ្មែរទាំងអស់ជួបតែពុទ្ធពរទាំង៤ប្រការ និងសូមធ្វើដំណើរប្រកបដោយសុវត្ថិភាពគ្រប់ពេលវេលា គ្រប់ទីកន្លែង សូមបងប្អូនទាំងអស់គ្នាចូលរួមគោរពច្បាប់ចរាចរណ៍ត្រូវប្រកាន់នូវ៖ ១- កុំបើកបរលើសល្បឿនកំណត់ គោរពសិទ្ធិអាទិភាព បើកបរប្រកាន់ស្តាំ ២- សូមកុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន ៣- ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ជារបស់មន្ត្រីនគរបាលចរាចរណ៍ផ្លូវគោក ៤-ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញាបែងចែកគន្លងផ្លូវ ៥-ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់ ៦-ត្រូវត្រួតពិនិត្យយានយន្តមុនចេញដំណើរ ដូចជាសំបកកង់ ហ្វាំងភ្លើងបំភ្លឺ និងចង្កូត ជាដើម ៧-ត្រូវពាក់មួកសុវត្ថិភាពឱ្យបានត្រឹមត្រូវជានិច្ច  ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ ៨- បន្តអប់រំផ្សព្វផ្សាយស្តីពីសុវត្ថិភាពចរាចរណ៍នៅគ្រឹះស្ថានសិក្សា ផ្តោតលើសិស្ស និស្សិត អ្នកប្រើប្រាស់ម៉ូតូ ៩-សូមកុំផ្ទុកអ្នកដំណើរ ឬទំនិញលើសចំណុះ។

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានលើកឡើងដូច្នេះ ក្នុងឱកាសអញ្ជើញដឹកនាំក្រុមប្រតិបត្តិ យុវជន និងអ្នកស្ម័គ្រចិត្តកាកបាទក្រហមកម្ពុជាសហការជាមួយអាជ្ញាធរមានសមត្ថកិច្ច បើកយុទ្ធនាការស្តីពី យុវជន និងការលើកកម្ពស់សុវត្ថិភាពចរាចរណ៍ផ្លូវគោកដើម្បីចូលរួមទប់ស្កាត់គ្រោះថ្នាក់ចរាចរណ៍ផ្លូវគោក ពិសេសក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌឆ្នាំនេះ ដែលមានអ្នកចូលរួមសរុបចំនួន ១១១នាក់ ស្រី៤៥នាក់  នាព្រឹកថ្ងៃទី១៧ ខែកញ្ញា ឆ្នាំ២០២៥។

បន្ទាប់ពីពិធីបើកយុទ្ធនាការខាងលើ កាកបាទក្រហមកម្ពុជាដឹកនាំក្រុមការងារជាពីរក្រុមចុះអប់រំផ្សព្វផ្សាយលើកកម្ពស់សុវត្ថិភាពចរាចរណ៍ផ្លូវគោក នៅតាមគោលដៅចំនួន ២កន្លែងផ្សេងគ្នា ស្ថិតក្នុងខណ្ឌពោធិ៍សែនជ័យ  ក្នុងរាជធានីភ្នំពេញ ក្នុងនោះគោលដៅទី១ ទល់មុខផ្សារស៊ិនជូរីផ្លាហ្សា និងគោលដៅទី២ នៅបរិវេណស្តុបទួលពង្រ។

សូមបញ្ជាក់ថា ក្នុងយុទ្ធនាការនេះក៏មានកម្មវិធីឆ្លើយសំណួរយកវត្ថុអនុស្សវរីយ៍ ដូចជា ក្រមា សៀវភៅសរសេរ និងមួកសុវត្ថិភាព ព្រមទាំងចែកបណ្ណផ្សព្វផ្សាយអំពីច្បាប់ចរាចរណ៍ផ្លូវគោក និងបណ្ណផ្សព្វផ្សាយសារសុខភាពសហគមន៍មានសុខភាពល្អ ផងដែរ។ ក្នុងឆ្នាំ២០២៤កន្លងទៅ គ្រោះថ្នាក់ចរាចរណ៍បានកើតឡើង២,៨៤៤លើក និងមានអ្នករងរបួសស្រាលចំនួន១,៤៤៧នាក់ អ្នករងរបួសធ្ងន់ចំនួន២,២៧៣នាក់ និងមានអ្នកស្លាប់សរុបប្រមាណ១,៥០៩នាក់ ក្នុងនោះមូលហេតុដែលបង្កឱ្យមានគ្រោះថ្នាក់រួមមាន៖ បើកបរល្មើសល្បឿន ៥០% មិនគោរពសិទ្ធិ ២១% មិនប្រកាន់ស្តាំ ១១% ប្រជែងគ្រោះថ្នាក់ ៧% ស្រវឹង ៥% បត់ ២% កត្តាយានយន្ត ២%,  ងងុយ១% និងមិនគោរពសញ្ញាចរាចរណ៍ ១%។ ក្នុងចំណោមអ្នកស្លាប់ជាអ្នកជិះម៉ូតូមានចំនួន ៧៧% (៥៣៧/៦៩៤នាក់) មិនពាក់មួកសុវត្ថិភាពចំនួន៦២% (៣៣២/ ៥៣៧នាក់)។ គ្រោះថ្នាក់ភាគច្រើនកើតឡើងនៅរាជធានីភ្នំពេញ ៣៦០លើក ខេត្តព្រះសីហនុ៨២លើក និងខេត្តកណ្តាល៦៦លើក៕

ដោយ៖ ពេជ្រ សំអឿន (ប្រភព៖កាកបាទក្រហមកម្ពុជា)