AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥ -- លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការជាតិបានថ្លែងថា ការយកច្បាប់អាជ្ញាសឹក និងច្បាប់ក្នុងស្រុករបស់ថៃ មកអនុវត្តក្នុងដែនអធិបតេយ្យកម្ពុជា គឺជាការបំពានយ៉ាងធ្ងន់ធ្ងរមកលើអធិបតេយ្យភាពកម្ពុជា និងច្បាប់អន្តរជាតិ រួមមាន ធម្មនុញ្ញអង្គការសហប្រជាជាតិ ធម្មនុញ្ញអាស៊ាន សន្ធិសញ្ញាមិត្តភាព និងកិច្ចសហប្រតិបត្តិការក្នុងតំបន់អាស៊ីអាគ្នេយ៍ ព្រមទាំងគោលការណ៍ច្បាប់ដែលទទួលស្គាល់ជាសកលដទៃទៀត។ 

លោកជំទាវឧត្តមសេនីយ៍ឯកបានលើកឡើងថាក្រសួងការពារជាតិនៃព្រះរាជាណាចក្រកម្ពុជា សូមបញ្ជាក់ថា ចំពោះមុខទង្វើហិង្សារបស់ភាគីថៃ បងប្អូនប្រជាពលរដ្ឋកម្ពុជាដែលជាម្ចាស់ដី និងប្រជាជនដទៃទៀតបានរួមគ្នាតវ៉ា និងឆ្លើយតបដោយសន្តិវិធី ដែលសកម្មភាពទាំងនេះគឺស្តែងចេញពីការព្រួយបារម្ភរបស់ពួកគាត់ចំពោះផលប៉ះពាល់ និងការគំរាមកំហែង ពីការរាយលួសបន្លា និងការប្រើប្រាស់កម្លាំងជាឯកតោភាគីរបស់ភាគីថៃ មកលើដែនអធិបតេយ្យរបស់កម្ពុជា ព្រមទាំងទ្រព្យសម្បត្តិស្របច្បាប់ដែលពួកគាត់បានគ្រប់គ្រង និងអាស្រ័យផលជាច្រើនឆ្នាំមកហើយ៕

ដោយ៖ គង់ សុិរីរ័ត្ន