AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥--ជាមួយនឹងការគូសបញ្ជាក់អំពីស្ថានភាពចុងក្រោយអំពីព្រំដែនកម្ពុជា និង ថៃ ប្រាប់ទៅកាន់ឯកអគ្គរដ្ឋទូតបារាំងនោះ សម្តេចអគ្គមហាសេនាបតីតេជោ ហ៊ុន សែន បានស្នើឱ្យបារាំងយកចិត្តទុកដាក់បន្ថែមទៀត ក្នុងការតាមដានអំពីស្ថានការណ៍ព្រំដែនរវាងកម្ពុជា និងថៃ ពិសេសគឺការជំរុញឱ្យភាគីទាំងពីរអនុវត្តន៍នូវបទឈប់បាញ់្យបានពេញលេញ ដោយសម្ដេចតេជោបានបញ្ជាក់ថា បទឈប់បាញ់នេះនូវតែមានភាពផុយស្រួយ ហើយអ្វីដែលកម្ពុជាចង់ឃើញ និងចង់បាននោះ គឺមិនឱ្យបារាំងទៅថ្កោលទោសប្រទេសណានោះទេ ក៏ប៉ុន្តែគ្រាន់តែជំរុញឱ្យភាគីទាំងពីរមានការអត់ធ្មត់ខ្ពស់ ដើម្បីអនុវត្តន៍នូវបទឈប់បាញ់ឱ្យបានពេញលេញ។

នេះបើយោងតាមការឱ្យដឹងរបស់ឯឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតឱ្យ ឯកឧត្តម Olivier Richard ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងថ្មី ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម នាព្រឹកថ្ងៃទី១៨ ខែកញ្ញា ឆ្នាំ២០២៥ នៅវិមានព្រឹទ្ធសភា។

ក្នុងជំនួបនោះ សម្ដេចតេជោ ហ៊ុន សែន បានសម្ដែងនូវក្ដីរីករាយ និងស្វាគមន៍ចំពោះឯកឧត្ដម ឯកអគ្គរដ្ឋទូតថ្មីនៃប្រទេសបារាំងប្រចាំកម្ពុជា ដោយសម្ដេចតេជោសង្ឃឹមថា ឯកឧត្តម Olivier Richard ដែលជាឯកអគ្គរដ្ឋទូតថ្មីនៃប្រទេសបារាំងប្រចាំកម្ពុជា និងជំរុញទំនាក់ទំនងរវាងកម្ពុជា និងបារាំង ឱ្យរីកចម្រើនបន្តទៀត។

ឯកឧត្តម Olivier Richard បានមានប្រសានសន៍ សម្ដែងនូវក្ដីអរគុណចំពោះសម្តេចអគ្គមហាសេនាបតីតេជោ ហ៊ុន សែន ដែលបានអនុញ្ញាតឱ្យឯកឧត្ដម និងសហការី បានចូលជួបសម្ដែងការគួរសម ហើយឯកឧត្ដមបានបង្ហាញនូវក្ដីរីករាយ ដែលឃើញទំនាក់ទំនងរវាង កម្ពុជា និងបារាំងមានភាពល្អប្រសើរ និងរីកចម្រើនជាបន្តបន្ទាប់។ ឯកឧត្ដមបានគូសរំលេចថា ក្នុងបេសកកម្មការទូតរបស់ឯកឧត្ដម នៅក្នុងព្រះរាជាណាចក្រកម្ពុជានាពេលនេះ ក្រៅពីការពង្រឹងទំនាក់ទំនងរវាងប្រទេសទាំងពីរ គឺការត្រៀមរៀបចំនៃដំណើរទស្សនកិច្ចរបស់លោកប្រធានាធិបតីបារាំង មកកាន់ព្រះរាជាណាចក្រកម្ពុជា នៅក្នុងឆ្នាំ២០២៦ខាងមុខ ហើយសង្ឃឹមថា វត្តមាននៃឯកឧត្ដមប្រធានាធិបតីបារាំងនៅកម្ពុជា នឹងជំរុញឱ្យទំនាក់ទំនងរវាងប្រទេសទាំងពីរឱ្យកាន់តែរីកចម្រើន។

សម្ដេចតេជោ ហ៊ុន សែន បានសម្ដែងនូវក្ដីពេញចិត្ត ហើយក៏ត្រៀមដើម្បីទទួលនូវវត្តមានទស្សនកិច្ចរបស់ឯកឧត្ដមប្រធានាធិបតីបារាំងមកកាន់កម្ពុជានៅពេលខាងមុខ។ សម្ដេចតេជោក៏បានលើកឡើង និងបង្ហាញនូវការពេញចិត្តនូវទំនាក់ទំនងរវាងប្រទេសទាំងពីរ កម្ពុជា និងបារាំង ដែលមានការរីកចម្រើន និងមានការវិវត្តជាបន្តបន្ទាប់។ សម្ដេចតេជោ ក៏បានថ្លែងនូវការដឹងគុណរបស់កម្ពុជា ចំពោះការជួយជ្រោមជ្រែងរបស់បារាំងនាពេលកន្លងមក ក្នុងការអភិវឌ្ឍនៅក្នុងព្រះរាជាណាចក្រកម្ពុជា ជាពិសេសការជួយលើកដំបូងក្នុងវិស័យកៅស៊ូ និងទឹកស្អាត ។ល។ ព្រមទាំងការបណ្ដុះបណ្ដាលធនធានមនុស្សរបស់កម្ពុជាផងដែរ។ សម្ដេចតេជោ ក៏បានរំលេចឱ្យភាគីទាំងពីរ កម្ពុជា និងបារាំង ត្រូវធ្វើការងារបន្ថែមទៀត ក្នុងការពង្រីកនូវសេដ្ឋកិច្ច ពាណិជ្ជកម្ម ជាមួយគ្នាឱ្យកាន់តែរីកចម្រើនជាងពេលបច្ចុប្បន្ន ដោយសម្ដេចចង់ឃើញទំហំពាណិជ្ជកម្មរវាងកម្ពុជា និងបារាំង មានការកើនឡើង។

សម្ដេចតេជោប្រមុខរដ្ឋស្ដីទី ក៏បានគូសបញ្ជាក់អំពីស្ថានភាពចុងក្រោយអំពីព្រំដែនកម្ពុជា និង ថៃ ប្រាប់ទៅកាន់ឯកអគ្គរដ្ឋទូតបារាំង ដោយស្នើឱ្យបារាំងយកចិត្តទុកដាក់បន្ថែមទៀត ក្នុងការតាមដានអំពីស្ថានការណ៍ព្រំដែនរវាងកម្ពុជា និងថៃ ពិសេសគឺការជំរុញឱ្យភាគីទាំងពីរអនុវត្តនូវបទឈប់បាញ់្យបានពេញលេញ ដោយសម្ដេចតេជោបានបញ្ជាក់ប្រាប់ទៅកាន់ឯកអគ្គរដ្ឋទូតបារាំងថា បទឈប់បាញ់នេះនូវតែមានភាពផុយស្រួយ ហើយអ្វីដែលកម្ពុជាចង់ឃើញ និងចង់បាននោះ គឺមិនឱ្យបារាំងទៅថ្កោលទោសប្រទេសណានោះទេ ក៏ប៉ុន្តែគ្រាន់តែជំរុញឱ្យភាគីទាំងពីរមានការអត់ធ្មត់ខ្ពស់ ដើម្បីអនុវត្តន៍នូវបទឈប់បាញ់ឱ្យបានពេញលេញ។

ជាការឆ្លើយតប ឯកឧត្តម Olivier Richard បានជម្រាបជូនសម្ដេចតេជោថា បារាំងបានយកចិត្តទុកដាក់ខ្លាំងណាស់ចំពោះបញ្ហាព្រំដែន រវាងកម្ពុជា និងថៃ ហើយបារាំងនឹងបន្តតាមដានលើបញ្ហានេះ។ ចំពោះទំនាក់ទំនងរវាងប្រទេសទាំងពីរ កម្ពុជា និងបារាំង នឹងកាន់តែបន្តរីកចម្រើន ជាពិសេសការពង្រីកពាណិជ្ជកម្មរវាងប្រទេសទាំងពីរនាពេលអនាគត និងការផ្លាស់ប្ដូរទស្សនកិច្ចរវាងមេដឹកនាំនៃប្រទេសទាំងពីរ៕

ដោយ៖ ជឹម ណារី