AKP បន្ទាយមានជ័យ ថ្ងៃទី១៨ ខែកញ្ញា ឆ្នាំ២០២៥-- ប្រជាពលរដ្ឋខ្មែរស្លូតត្រង់ចំនួន៤ នាក់ទៀត កំពុងសម្រាកព្យាបាលនៅមន្ទីរពេទ្យបង្អែកប៉ោយប៉ែត ខេត្តបន្ទាយមានជ័យ បន្ទាប់ពីរងគ្រោះដោយសារផ្សែងពុល និងគ្រាប់កៅស៊ូរបស់កងកម្លាំងចម្រុះថៃ។ ករណីប៉ះទង្គិចនេះបានកើតឡើង កាលពីរសៀលថ្ងៃទី១៧ ខែកញ្ញា ឆ្នាំ ២០២៥ នៅពេលដែលកងទ័ពថៃបានចូលមកបោះបង្គោល និងរាយបន្លាលួសដើម្បីរំលោភយកដីធ្លីរបស់ប្រជាពលរដ្ឋខ្មែរ។

ពលរដ្ឋរងគ្រោះទាំង ៤ នាក់មានឈ្មោះ មាស គឹមហេង, ភិន វី, មាន សំបូរ, និង ពៅ តុលា ដែលរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ។ យោងតាមការបញ្ជាក់របស់លោកវេជ្ជបណ្ឌិត ឱក ទីនណា ប្រធានមន្ទីរពេទ្យបង្អែកប៉ោយប៉ែត ជនរងគ្រោះបានរងរបួសដោយសារឧស្ម័នបង្ហូរទឹកភ្នែក និងផ្សែងពុលដែលធ្វើឱ្យប៉ះពាល់ដល់ផ្លូវដង្ហើម។ លើសពីនេះ កងកម្លាំងថៃក៏បានប្រើប្រាស់ឧបករណ៍បំពងសំឡេងដែលមានហ្វ្រេកង់ខ្ពស់ ដែលបង្កផលប៉ះពាល់យ៉ាងខ្លាំងដល់ត្រចៀក និងខួរក្បាលរបស់ប្រជាពលរដ្ឋផងដែរ។

ការប៉ះទង្គិចហិង្សានេះបានបណ្តាលឱ្យមានអ្នករងរបួសសរុបចំនួន ២៧ អង្គ/នាក់ រួមមានទាំងកងទ័ព ព្រះសង្ឃ និងប្រជាពលរដ្ឋ។ ក្នុងចំណោមអ្នករងរបួស ខ្លះបានសន្លប់ និងខ្លះទៀតរងរបួសធ្ងន់ និងស្រាល។ វីរកងទ័ពម្នាក់ក៏បានរងរបួសចំភ្នែកធ្ងន់ធ្ងរដោយសារកងទ័ពថៃបានបាញ់គ្រាប់ជំពាមដែក ហើយបច្ចុប្បន្នគាត់កំពុងសម្រាកព្យាបាលនៅមន្ទីរពេទ្យព្រះអង្គឌួង រាជធានីភ្នំពេញ។

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានថ្កោលទោសយ៉ាងដាច់អហង្ការចំពោះទង្វើឈ្លានពានរបស់កងទ័ពថៃនេះ។ ឯកឧត្តមបានបញ្ជាក់ថា ការប្រើប្រាស់អំពើហិង្សាប្រដាប់ដោយអាវុធ និងឧបករណ៍បង្រ្កាបទៅលើប្រជាពលរដ្ឋស្លូតត្រង់ គឺជាការរំលោភបំពានយ៉ាងធ្ងន់ធ្ងរដល់បូរណភាពទឹកដី និងអធិបតេយ្យភាពរបស់កម្ពុជា។

អាស៊ានបញ្ជូនអ្នកសង្កេតការណ៍ដើម្បីប្រមូលព័ត៌មានដើម្បីដោះស្រាយស្ថានការណ៍តានតឹងនេះ ក្រុមអ្នកសង្កេតការណ៍អន្តរកាលអាស៊ានបានចុះដល់ទីតាំងកើតហេតុនៅយប់នេះ ដើម្បីប្រមូលទិន្នន័យ និងព័ត៌មានជាក់ស្តែង។ បេសកកម្មនេះក៏មានគោលបំណងពិនិត្យមើលស្ថានភាពរបស់ជនរងគ្រោះផងដែរ ដើម្បីរៀបចំរបាយការណ៍បឋមដាក់ជូនថ្នាក់ដឹកនាំអាស៊ានសម្រាប់ចាត់វិធានការបន្ទាន់។

សហគមន៍អន្តរជាតិកំពុងតាមដានយ៉ាងយកចិត្តទុកដាក់ចំពោះជម្លោះព្រំដែននេះ និងរំពឹងថាភាគីពាក់ព័ន្ធទាំងអស់នឹងរកដំណោះស្រាយដោយសន្តិវិធី និងចៀសវាងការបង្កជម្លោះបន្ថែមទៀត៕

ដោយ ឈុន សារ៉ាត