AKP បន្ទាយមានជ័យ ថ្ងៃទី២៣ ខែកញ្ញា ឆ្នាំ២០២៥-- ប្រជាពលរដ្ឋ និងព្រះសង្ឃមកពីបណ្ដាភូមិ និងស្រុកផ្សេងៗក្នុងខេត្តបន្ទាយមានជ័យ បានបន្តមកមើលតំបន់ព្រំដែនផ្ទាល់ភ្នែក ស្ថិតនៅភូមិព្រៃចាន់ ឃុំអូរបីជាន់ ស្រុកអូរជ្រៅ ដើម្បីជាការគាំទ្រ និងលើកទឹកចិត្តដល់កងកម្លាំងជួរមុខដែលកំពុងឈរជើងការពារបូរណភាពទឹកដីកម្ពុជា ព្រឹកថ្ងៃទី២៣ ខែកញ្ញា ឆ្នាំ២០២៥។

ការមកដល់នេះបានធ្វើឡើងបន្ទាប់ពីឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងឱ្យដឹងថា ប្រជាពលរដ្ឋខ្មែរចំនួន ១៩គ្រួសារនៅភូមិព្រៃចាន់ ត្រូវបានយោធាថៃបង្ខំឱ្យចាកចេញពីលំនៅឋាន និងដីចម្ការរបស់ខ្លួន។ យោធាថៃបានរំលោភចូលទឹកដីកម្ពុជា និងបានរាយបន្លាលួសនៅតំបន់នេះ ដែលបង្កឱ្យមានការតានតឹង និងការប៉ះទង្គិចគ្នារវាងកងទ័ព ក៏ដូចជាប្រជាពលរដ្ឋខ្មែរជាមួយយោធាថៃដែលមានពលរដ្ឋ កងកម្លាំងនគរបាល ទាហាន និងព្រះសង្ឃសរុប ២៩ អង្គ/រូប បានរងរបួសធ្ងន់និងស្រាលពីហេតុការណ៍ដែលកើតឡើងកាលពីរសៀលថ្ងៃទី១៧ ខែកញ្ញា ឆ្នាំ២០២៥។ កងកម្លាំងយោធាថៃបានអនុវត្ត "ច្បាប់ថៃនៅលើទឹកដីខ្មែរ" ដោយបានបាញ់ឧស្ម័នបង្ហូរទឹកភ្នែក ប្រើចំពាមកៅស៊ូ និងឧបករណ៍សំឡេងរំខានផ្សេងទៀត ដែលបង្កឱ្យមានរបួសដល់ត្រចៀកផង។

ព្រះសង្ឃ និងប្រជាពលរដ្ឋដែលបានអញ្ជើញមកដល់ទីតាំងកើតហេតុ បានសម្ដែងនូវការឈឺចាប់ និងខកចិត្តយ៉ាងខ្លាំងចំពោះទង្វើរបស់ភាគីថៃ។ ពួកគេបានលើកឡើងស្របគ្នាថា ការរំលោភបំពាននេះ គឺជាទង្វើដែលមិនអាចទទួលយកបាន។

ព្រះសង្ឃមួយអង្គដែលបាននិមន្តមកពីស្រុកមង្គលបុរី មានសង្ឃដីកាថា៖ "អាត្មាបានឃើញព័ត៌មានតាមបណ្ដាញសង្គម និងទូរទស្សន៍ តែនៅពេលបានមកឃើញផ្ទាល់ភ្នែកបែបនេះ កាន់តែមានការឈឺចាប់ខ្លាំង។ យើងមិនអាចមើលរំលងបានឡើយ ព្រោះទឹកដីគឺជាអាយុជីវិតរបស់ជាតិ។ យើងសូមចូលរួមបួងសួង និងជូនពរដល់កងកម្លាំងយោធាជួរមុខទាំងអស់ សូមឱ្យមានកម្លាំងកាយចិត្តរឹងមាំ ដើម្បីការពារបូរណភាពទឹកដីឱ្យបានគង់វង្ស"។

ចំណែកឯស្ត្រីវ័យចំណាស់ម្នាក់មកពីក្រុងសិរីសោភ័ណ បានថ្លែងទាំងអួលដើមកថា "ខ្ញុំមិនអាចនៅស្ងៀមបានឡើយ ពេលដឹងថាពលរដ្ឋយើងត្រូវគេបណ្ដេញចេញពីផ្ទះរបស់ខ្លួនឯង។ ខ្ញុំនិងគ្រួសារបាននាំគ្នាជិះឡានមកទីនេះ ដើម្បីលើកទឹកចិត្តក្មួយៗទាហាន និងឱ្យពួកគាត់ដឹងថា យើងនៅពីក្រោយពួកគាត់ជានិច្ច។ សូមឱ្យពួកគាត់កុំបាក់ទឹកចិត្ត ហើយបន្តតស៊ូដើម្បីការពារបូរណភាពទឹកដី"។

ប្រជាពលរដ្ឋជាច្រើនទៀតក៏បានបង្ហាញពីការគាំទ្រដល់ចំណាត់ការរបស់រាជរដ្ឋាភិបាលកម្ពុជា និងបានអំពាវនាវដល់សហគមន៍អន្តរជាតិឱ្យជួយអន្តរាគមន៍ដោះស្រាយបញ្ហាព្រំដែននេះដោយសន្តិវិធី និងគោរពច្បាប់អន្តរជាតិ។
ទិដ្ឋភាពនេះបានបង្ហាញយ៉ាងច្បាស់ពីសាមគ្គីភាព និងស្មារតីស្នេហាជាតិរបស់ប្រជាពលរដ្ឋ និងព្រះសង្ឃខ្មែរ ដែលតែងតែរួបរួមគ្នាដើម្បីការពារផលប្រយោជន៍ និងអធិបតេយ្យភាពជាតិ៕

ដោយ ឈុន សារ៉ាត