AKP ភ្នំពេញ ថ្ងៃទី២៣ ខែកញ្ញា ឆ្នាំ២០២៥-- នៅក្នុងរដូវកាលបៃតង បើទោះបីជាមានភ្លៀងធ្លាក់យ៉ាងណាក៏ដោយ ក៏ភ្ញៀវទេសចរជាតិ និងអន្តរជាតិយ៉ាងច្រើនកុះករមកពីគ្រប់ទិសទីនៅទូទាំងប្រទេសកម្ពុជា និងពិភពលោក បានធ្វើដំណើរមកកាន់ខេត្តសៀមរាប ដើម្បីទស្សនាព្រឹត្តិការណ៍សមរាត្រី (Equinox) ពីថ្ងៃទី២១-២៣ ខែកញ្ញា ឆ្នាំ២០២៥។ នេះបើតាមការលើកឡើងរបស់ក្រសួងទេសចរណ៍ និងបានសន្យាជួបគ្នាម្តងទៀត ចាប់ពីថ្ងៃទី២១ ដល់ថ្ងៃទី២៣  ខែមីនា  ឆ្នាំ២០២៦។

ក្រសួងទេសចរណ៍បានលើកឡើងថា ដោយសារកត្តាអាកាសធាតុ ភ្ញៀវទេសចរជាតិ និងអន្តរជាតិខកខានការទស្សនាព្រះអាទិត្យរះចំកណ្តាលកំពូលនៃប្រាសាទអង្គរវត្ត ប៉ុន្តែពួកគាត់បានបន្តការទស្សនាប្រាសាទអង្គរវត្ត ព្រមទាំងរមណីយដ្ឋានទេសចរណ៍នានានៅក្នុងខេត្តសៀមរាបប្រកបដោយក្តីសោមនស្សរីករាយ និងទទួលបានបទពិសោធន៍ថ្មីក្នុងរដូវកាលបៃតង ដែលបរិយាកាសមានភាពស្រស់ស្រាយ ពណ៌បៃតង និងត្រជាក់ត្រជុំ។

ក្រសួងទេសចរណ៍ សូមថ្លែងអំណរគុណ និងសូមស្វាគមន៍ភ្ញៀវទេសចរជាតិ និងអន្តរជាតិត្រឡប់មកវិញម្តងទៀតដើម្បីទស្សនាព្រឹត្តិការណ៍ដ៏អស្ចារ្យនៃសមរាត្រីអង្គរ (Equinox) ចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២៦ខាងមុខ៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)