AKP តាកែវ ថ្ងៃទី២៤ ខែកញ្ញា ឆ្នាំ២០២៥--

ឯកឧត្តម វ៉ី សំណាង អភិបាលខេត្តតាកែវបានអំពាវនាវដល់កងកម្លាំងប្រដាប់អាវុធទាំង ៣ប្រភេទ ត្រូវធ្វើយ៉ាងណាការពាររដ្ឋធម្មនុញ្ញ ការពាររាជបល្ល័ង្ក និងការពាររាជរដ្ឋាភិបាលស្របច្បាប់ ជាពិសេសការពារប្រជាពលរដ្ឋឱ្យបានជាដាច់ខាត។ ការអំពាវនាវរបស់អភិបាលខេត្តតាកែវយ៉ាងដូច្នេះធ្វើឡើងក្នុងឱកាស នៃការនាំយកនំអន្សម គ្រឿងហូបចុក និងថវិកាមួយចំនួនទៅប្រគល់ជូនដល់កងកម្លាំងរាជអាវុធហត្ថ កងទ័ព និងកងនគរបាល ដែលកំពុងឈរជើងការពារតាមខ្សែបន្ទាត់ព្រំដែន កម្ពុជា-វៀតណាម ក្នុងភូមិសាស្ត្រខេត្តតាកែវ នាថ្ងៃនៃពិធីអបអរសាទរខួប ៣២ឆ្នាំ ទិវាប្រកាសរដ្ឋធម្មនុញ្ញ ថ្ងៃទី២៤ ខែឧសភា ឆ្នាំ២០២៥។

 
ថ្លែងនៅចំពោះមុខកងកម្លាំងប្រដាប់អាវុធទាំង៣ប្រភេទ នៅទីបញ្ជាការដ្ឋានវរការពារព្រំដែនកំពង់ក្រសាំង ស្ថិតក្នុងស្រុកបូរីជលសាក្នុងឱកាសនេះ  ឯកឧត្តមអភិបាលខេត្តតាកែវបានលើកឡើងថា រដ្ឋធម្មនុញ្ញនៃព្រះរាជាណាចក្រកម្ពុជាមានភាពរឹងមាំក្នុងរយៈពេល៣២ឆ្នាំកន្លងមកនេះ គឺដោយសារកងកម្លាំងប្រដាប់អាវុធបានជួយទ្រទ្រង់ការពារ ហើយថា នៅពេលរដ្ឋធម្មនុញ្ញរឹងមាំវានឹងនាំឱ្យប្រទេសមានស្ថិរភាព រាជរដ្ឋាភិបាលមានឱកាសក្នុងការអភិវឌ្ឍប្រទេសជាតិឱ្យកាន់តែរីកចម្រើនថែមទៀត។

ឯកឧត្តម វ៉ី សំណាង  បានប្រាប់កងកម្លាំងប្រដាប់អាវុធទាំងអស់ឱ្យជឿជាក់លើការដឹកនាំដ៍ត្រឹមត្រូវរបស់រាជរដ្ឋាភិបាល និងជឿជាក់ទៅលើការដោះស្រាយបញ្ហាព្រំដែនជាមួយប្រទេសជិតខាង ដោយរាជរដ្ឋាភិបាលនឹងមិនធ្វើឱ្យបាត់បង់ទឹកដី ហើយក៏មិនចង់បានទឹកដីពីប្រទេសណាមួយដែរ៕

ដោយ៖ ចាន់ សុភឿន (ប្រភព៖ រដ្ឋបាលខេត្តតាកែវ)