AKP ភ្នំពេញ ថ្ងៃទី០២ ខែតុលា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គការមូលនិធិដុនបូស្កូកម្ពុជា ក្នុងការចូលរួមចំណែកជាមួយក្រសួងអប់រំ យុវជន និងកីឡា ដើម្បីផ្តល់ការអប់រំប្រកបដោយសមធម៌ និងបរិយាបន្នដោយសម្រេចបានសមិទ្ធផលជាច្រើននាពេលកន្លងមកផ្អែកលើគោលការណ៍ផ្តល់ការអប់រំចំណេះទូទៅ ស្របតាមកម្មវិធីរបស់ក្រសួងអប់រំ យុវជន និងកីឡាចាប់ពីថ្នាក់មត្តេយ្យកម្រិត១ ដល់ថ្នាក់ទី១២ដល់កុមារ និងយុវជនក្រីក្រ។ ការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន យ៉ាងដូច្នេះ ក្នុងឱកាសនៃការជួបពិភាក្សាការងារជាមួយលោក យូជីន ខាល់កូ ប្រធានអង្គការមូលនិធិដុនបូស្កូកម្ពុជា នៅទីស្តីការក្រសួង កាលពីរសៀលថ្ងៃទី០១  ខែតុលា  ឆ្នាំ២០២៥។  

ឯកឧត្តមបណ្ឌិតសភាចារ្យបានគូសបញ្ជាក់ថា ការផ្តល់អាហារូបករណ៍ដោយអង្គការមូលនិធិដុនបូស្កូកម្ពុជាដល់សិស្សានុសិស្សក្រីក្រដែលសិក្សានៅសាលារដ្ឋចំនួន១៥ខេត្ត/ក្រុងបានធ្វើឱ្យពួកគេរឹងមាំ មានសីលធម៌ល្អ ស្រឡាញ់ប្រពៃណីវប្បធម៌ខ្លួន មានគុណធម៌ សមត្ថភាព និងមានអនាគតភ្លឺស្វាង។ បន្ថែមពីនេះឯកឧត្តមឧបនាយករដ្ឋមន្ត្រីបានបញ្ជាក់ពីការគាំទ្រចំពោះផែនការពង្រីកបន្ថែមកម្មវិធីបណ្តុះបណ្ដាលបច្ចេកទេស និងវិជ្ជាជីវៈរបស់អង្គការមូលនិធិដុនបូស្កូកម្ពុជាដែលឆ្លើយតបយ៉ាងប្រសើរទៅនឹងអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាក្នុងការអនុវត្តគន្លងអប់រំថ្មីដែលមាន៣គន្លងគឺ ផ្នែកវិទ្យាសាស្ត្រ វិទ្យាសាស្ត្រសង្គម និងការអប់រំបច្ចេកទេសបណ្តុះបណ្ដាលវិជ្ជាជីវៈនៅតាមសាលារៀនគោលដៅមួយចំនួន។

ក្នុងឱកាសនេះ លោក យូជីន ខាល់កូ ប្រធានអង្គការមូលនិធិដុនបូស្កូកម្ពុជាបានបង្ហាញពីការកត់សម្គាល់របស់ខ្លួនថា ក្រសួងអប់រំ យុវជន និងកីឡា ពិតជាបានផ្តល់កិច្ចសហប្រតិបត្តិប្រកបដោយការយកចិត្តទុកដាក់ និងបានលើកឡើងពីសាវតារនៃអង្គការមូលនិធិដុនបូស្កូដែលមាននៅ១៣៣ប្រទេសទូទាំងពិភពលោក ព្រមទាំងបានចែករំលែកពីវឌ្ឍនភាពនៃបេសកកម្មរបស់អង្គការក្នុងវិស័យអប់រំនាពេលកន្លងមក ដែលផ្តល់ការអប់រំចំណេះទូទៅ ជំនាញវិជ្ជាជីវៈដល់កុមារ យុវជនក្រីក្រតាមប្រព័ន្ធអប់រំរបស់រដ្ឋ និងប្រើប្រាស់ប្រព័ន្ធអប់រំការពារដុនបូស្កូ ដើម្បីឱ្យមានការងារធ្វើ និងក្លាយជាធនធានមនុស្ស និងពលរដ្ឋល្អ ដើម្បីស្ថាបនាគ្រួសារ និងសង្គមជាតិ ដោយបច្ចុប្បន្នអង្គការមានសាខាចំនួន៥នៅទូទាំងប្រទេសកម្ពុជា ដូចជានៅរាជធានីភ្នំពេញ ខេត្តព្រះសីហនុ បាត់ដំបង ក្រុងប៉ោយប៉ែត និងខេត្តកែប៕

ដោយ៖ ចាន់ សុភឿន (ប្រភព៖ ក្រសួងអប់រំ)