AKP ភ្នំពេញ ថ្ងៃទី០២ ខែតុលា ឆ្នាំ២០២៥-- ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានមានប្រសាសន៍ថា ថ្នាក់ដឹកនាំ និងមន្ដ្រីជំនាញទាំងអស់ត្រូវយកចិត្តទុកដាក់ខ្ពស់ក្នុងការអនុវត្តការងារស្របតាមតួនាទី ភារកិច្ច ដែលខ្លួនទទួលខុសត្រូវ ក្នុងគោលដៅពង្រឹងប្រសិទ្ធភាពការងារ និងមានភាពធន់។

ក្នុងកិច្ចប្រជុំស្ដីពី ការពង្រឹងប្រសិទ្ធភាពការអនុវត្តគម្រោង ហិរញ្ញប្បទានពីដៃគូអភិវឌ្ឍន៍របស់ក្រសួងអភិវឌ្ឍន៍ជនបទ ឯកឧត្តមរដ្ឋមន្ត្រីបានគូសបញ្ជាក់ថា ការគ្រប់គ្រងគម្រោងគឺដើម្បីពង្រឹងប្រសិទ្ធភាពឱ្យស្របតាមគោលការណ៍រួមគ្នាគិត រួមគ្នាអនុវត្ត និងរួមគ្នាទទួលខុសត្រូវ និងស្របតាមកំណែទម្រង់របស់រាជរដ្ឋាភិបាល ជាពិសេសអភិក្រមនៃកំណែទម្រង់ដែលជោគជ័យរួមមាន៖ ទី១.ត្រូវមានចក្ខុវិស័យច្បាស់លាស់ដើម្បីប្រយោជន៍ជាតិ ទី២. ត្រូវការប្តេជ្ញាចិត្តខ្ពស់ ទី៣. ត្រូវមានការចូលរួមដោយស្មោះត្រង់ និងទី៤.ត្រូវមានការលះបង់ ។

ក្នុងឱកាសនោះដែរ ឯកឧត្តម បាន បូរ័ត្ន អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានប្រកាសស្ដីពីការបង្កើតអង្គភាពគ្រប់គ្រង និងអនុវត្តគម្រោងក្រោមហិរញ្ញប្បទានពីដៃគូមួយចំនួន រួមមាន ទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន, ធនាគារវិនិយោគហេដ្ឋារចនាសម្ព័ន្ធអាស៊ី និងមូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ។

សូមជម្រាបជូនថា កិច្ចប្រជុំស្ដីពីការពង្រឹងប្រសិទ្ធភាពការអនុវត្តគម្រោង ហិរញ្ញប្បទានពីដៃគូអភិវឌ្ឍន៍របស់ក្រសួងអភិវឌ្ឍន៍ជនបទ  បានប្រព្រឹត្តនៅកាលពីថ្ងៃទី០១ ខែតុលា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីឯកឧត្ដមរដ្ឋលេខាធិការប្រចាំការ ឯកឧត្ដម លោកជំទាវ ជាថ្នាក់ដឹកនាំ ព្រមទាំងមន្ដ្រីជំនាញដែលជាសមាសភាពអនុវត្តគម្រោង នៃក្រសួងអភិវឌ្ឍន៍ជនបទ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)