AKP ភ្នំពេញ ថ្ងៃទី១២ ខែធ្នូ ឆ្នាំ២០២៥-- ក្នុងស្មារតី និងទឹកចិត្ដគាំទ្រជួយដល់វីរកងទ័ពនៅសមរភូមិជួរមុខ មានសប្បុរសជន មន្ត្រីរាជការ កងកម្លាំង សមត្ថកិច្ច និងគណៈកម្មការគ្រប់គ្រងផ្សារមួយចំនួននៅរាជធានីភ្នំពេញ នៅតែបន្តសម្រុកយកអំណោយជាថវិកា គ្រឿងឧបភោគ បរិភោគ និងសម្ភារប្រើប្រាស់ចាំបាច់ជាច្រើនមុខរហូតមកដល់ពេលនេះ ទទួលបានថវិកា២៦២ ៣៣៣ ៣១២ រៀលនិង៦៣៦៥៨ដុល្លារ យកមកប្រគល់ជូនរដ្ឋបាលរាជធានីភ្នំពេញ ដើម្បីបន្តយកទៅចែកជូនវីរកងទ័ព ដែលកំពុងឈរជើងប្រយុទ្ធនៅសមរភូមិមុខ និងពលរដ្ឋជាជនភៀសសឹក ខណៈក្រុមទាហានថៃ កំពុងបន្តវាយប្រហារឈ្លានពានចូលបូរណភាពទឹកដីកម្ពុជានៅតាមបន្ទាត់ព្រំដែនធ្វើឱ្យមានការផ្ទុះសង្គ្រាមរយៈពេល៦ថ្ងៃហើយបើគិតមកដល់ពេលនេះ ដោយពិធីប្រគល់ និងទទួលអំណោយពីសប្បុរសជននេះ ធ្វើឡើងចាប់តាំងពីថ្ងៃទី០៧ រហូតដល់ថ្ងៃទី១១ ខែធ្នូ ឆ្នាំ២០ ២៥ ដោយមានថ្នាក់ដឹកនាំ ជាអភិបាលរងរាជធានីភ្នំពេញ៣រូប ចាំទទួលផងដែរ។

អំណោយដែលនាំមកប្រគល់ជូននេះ ជាអំណោយសប្បុរសជន ដែលមានប្រជាពលរដ្ឋ មន្ត្រីរាជការ កងកម្លាំង និងគណៈកម្មការគ្រប់គ្រងផ្សារមួយចំនួននៅរាជធានីភ្នំពេញ ជាង២០រូប និងស្ថាប័នរួមមាន៖ អនុប្រធាននាយកដ្ឋានកងអង្គរក្ស គណៈកម្មការគ្រប់គ្រងផ្សារអូរឫស្សី គណៈកម្មការគ្រប់គ្រងផ្សារបឹងកេងកង គណៈកម្មការគ្រប់គ្រងផ្សារកណ្តាល គណៈកម្មការគ្រប់គ្រងផ្សារចាស់ គណៈកម្មការអភិបាលរដ្ឋករគ្រប់គ្រងផ្សារធំថ្មី គណៈកម្មការគ្រប់គ្រងផ្សារដើមគរនៃរដ្ឋបាលរាជធានីភ្នំពេញ សម្ព័ន្ធធុរកិច្ចកម្ពុជាអន្តរជាតិ មន្ទីរមុខងារសាធារណៈរាជធានីភ្នំពេញ សាខាពន្ធដារខណ្ឌចំការមន ភរិយារបស់លោក កើត ឆែ អភិបាលរងខេត្តកំពត ព្រមទាំងប្រជាពលរដ្ឋជាច្រើននាក់ទៀត។

អំណោយទាំងនេះរួមមាន៖ ថវិកា មី ទឹកបរិសុទ្ធ អង្ករ ខ្សែចង មួក កន្ទេល នំក្រៀម មី ត្រីងៀត ទឹកត្រី ទឹកស៊ីអ៊ីវ ស្ពៃក្តោប ប្រែងឆា ឆ្នាំង អំបុក ភួយ,ទឹកផ្លែឈើនិងទឹកក្រូច ក្រម៉ា អាវជជុះ និងថ្នាំពេទ្យជាដើម។

លោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនៅថ្ងៃទី១១ ខែធ្នូ ឆ្នាំ២០២៥ថា ‎បើគិតចាប់តាំងពីថ្ងៃទី០៧ ខែធ្នូ រហូតដល់ថ្ងៃទី១១ ខែធ្នូ ២០២៥នេះ រដ្ឋបាលរាជធានីភ្នំពេញបានទទួលថវិកាសរុប២៦២.៣៣៣.៣១២រៀល និង៦៣.៦៥៨ដុល្លារអាមេរិក ជាមួយសម្ភារ គ្រឿងឧបភោគ បរិភោគ ថ្នាំពេទ្យ សម្ភារផ្សេងៗជាច្រើនមុខ ទៀត។

លោក ហួត ហៃ អភិបាលរងតំណាងឯកឧត្តម ឃួង ស្រេង អភិបាលរាជធានីភ្នំពេញ បានអរគុណនូវទឹកចិត្តសប្បុរសធម៌របស់បងប្អូនប្រជាពលរដ្ឋរស់នៅក្នុងរាជធានីភ្នំពេញ ទាំងអាជីវករ ទាំងមន្ត្រីរាជការ គណៈកម្មការគ្រប់គ្រងគ្រប់ផ្សារមួយចំនួននៃរដ្ឋបាលរាជធានី បានផ្តល់អំណោយទៅសមរភូមិមុខតាមរយៈរដ្ឋបាលរាជធានីភ្នំពេញក្នុងស្មារតីខ្មែរជួយជាតិខ្មែរ។ រដ្ឋបាលរាជធានីភ្នំពេញសូមធានាថា នឹងនាំយកអំណោយទាំងអស់របស់បងប្អូនទៅចែកជូនដល់ដៃវីរកងទ័ពជួរមុខ និងជនភៀសសឹកដល់ដៃផងដែរ។ រដ្ឋបាលរាជធានីភ្នំពេញនៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ៕

ដោយ សួស សំរិត