AKP ស្ទឹងត្រែង ថ្ងៃទី១០ ខែមករា ឆ្នាំ២០២៥

ឯកឧត្តមសាស្ត្រាចារ្យ យិត ស៊ុនណារ៉ា រដ្ឋលេខាធិការ ក្រសួងសុខាភិបាលបានណែនាំឱ្យនាយក សាលាមធ្យមសិក្សាសុខាភិបាលភូមិភាគស្ទឹងត្រែងថ្មី ត្រូវបន្តដឹកនាំប្រកបដោយប្រសិទ្ធភាព និងពង្រឹងការបណ្ដុះបណ្ដាលជំនាញបច្ចេកទេសដល់និស្សិតដើម្បីក្លាយជាធនធានដ៏មានគុណភាព និងប្រសិទ្ធភាព។ ការថ្លែងបែបនេះក្នុងពិធីប្រកាសតែងតាំងមុខតំណែងនាយកសាលាមធ្យមសិក្សាសុខាភិបាលភូមិភាគស្ទឹងត្រែង នាព្រឹកថ្ងៃទី១០ ខែមករា ឆ្នាំ២០២៥ នៅខេត្ដស្ទឹងត្រែង។ ក្នុងពិធីនេះដែរ ក៏មានការចូលរួមពីឯកឧត្តម សរ សុពុត្រា អភិបាលខេត្តស្ទឹងត្រែង និងឯកឧត្តម ឈាង ឡាក់ ប្រធានក្រុមប្រឹក្សាខេត្ត និងថ្នាក់ដឹកនាំ មន្រ្តីរាជការ កងកម្លាំង គ្រប់ថ្នាក់ ជុំវិញរដ្ឋបាលខេត្តស្ទឹងត្រែង និងនិស្សិតសរុបជិត ១ ០០០ នាក់។

ឯកឧត្តម សរ សុពុត្រា អភិបាលខេត្តស្ទឹងត្រែងបានមានប្រសាសន៍កោតសរសើរចំពោះការរួមចំណែកបាននូវការបណ្តុះបណ្ដាលធនធានមនុស្សក្នុងវិស័យសុខាភិបាល ហើយឯកឧត្ដមក៏លើកឡើងពីអនុស្សាវរីយ៍ពីវីរភាពរបស់ក្រុមគ្រូពេទ្យដែលជាទ័ពអាវសក្នុងការតស៊ូប្រយុទ្ធនឹងជំងឺកូវីដ-១៩ ដែលស្ថានការដ៏លំបាកបំផុត។ ឯកឧត្ដមអភិបាលខេត្ដក៏សូមអបអរសាទរ ផ្តាំផ្ញើដល់លោកវេជ្ជបណ្ឌិត តាត សុវណ្ណ ដែលបានចាកចេញពីសាលាមកបម្រើការងារនៅទីនេះរយៈកាលជាង២០ឆ្នាំ សូមបន្តការខិតខំប្រឹងប្រែង សម្របសម្រួល ផ្សារភ្ជាប់អង្គភាពជុំវិញខេត្ត ដឹកនាំសាលាឱ្យបន្តរីកចម្រើន ទំនើប ទាន់សម័យ ប្រកបដោយប្រសិទ្ធភាព ប្រសិទ្ធផលខ្ពស់ក្លាយជាអង្គភាពគំរូ។

ជាមួយគ្នានេះ សាស្រ្តាចារ្យជំនួយ វេជ្ជបណ្ឌិត តាត សុវណ្ណ បានថ្លែងអំណរគុណ និងដឹងគុណដល់ថ្នាក់ដឹកនាំក្រសួងសុខាភិបាល និងរដ្ឋបាលខេត្តស្ទឹងត្រែង ព្រមទាំងបានប្តេជ្ញាគោរពអនុវត្តន៍ម៉ឺងម៉ាត់ចំពោះរដ្ឋធម្មនុញ្ញ គោលនយោបាយ លិខិតបទដ្ឋានគតិយុត្តនានារបស់រាជរដ្ឋាភិបាល ក្រសួងសុខាភិបាល រដ្ឋបាលខេត្តស្ទឹងត្រែង ដោយពង្រឹងសាមគ្គីភាព ឯកភាព តម្លាភាព គុណភាព ការបង្កើតថ្មី ប្រសិទ្ធភាពការងារ។

ក្នុងឱកាសនោះ ឯកឧត្តមសាស្រ្ដាចារ្យ យិត ស៊ុនណារ៉ា បានថ្លែងសាទរចំពោះសមិទ្ធផលក្រោមការដឹកនាំរបស់នាយកសាលាចាស់ ឱសថការី តឹក ឡេងស៊ឺ និងបានណែនាំដល់នាយកសាលាថ្មី វេជ្ជបណ្ឌិត តាត សុវណ្ណ ឱ្យបន្តខិតខំថែរក្សាពូនជ្រុំ រក្សានូវស្មារតីសាមគ្គីភាព ឯកភាពផ្ទៃក្នុង ពង្រឹងការបណ្ដុះបណ្ដាលជំនាញបច្ចេកទេស ចំណេះដឹងដល់និស្សិតទាំងអស់ ឱ្យទទួលបាននូវចំណេះដឹង និងមានក្រោមសីលធម៌វិជ្ជាជីវៈខ្ពស់ទាំងនៅក្នុងការរៀនសូត្រក្នុងសាលាក៏ដូចជាពេលចប់ត្រឡប់ទៅបម្រើការងារនៅតាមមូលដ្ឋានរបស់ខ្លួនវិញ។

ឯកឧត្ដមក៏បានជំរុញឱ្យនាយកសាលាថ្មី ពង្រឹងការបណ្ដុះបណ្ដាលជំនាញបច្ចេកទេស និងពង្រឹងចំណេះដឹងដល់និស្សិតដែលកំពុងសិក្សានៅក្នុងសាលាដើម្បីក្លាយជាធនធានដ៏មានគុណភាព ប្រសិទ្ធភាព ស័កិ្ដសិទ្ធភាព ចូលរួមលើកតម្កើងដល់វិស័យសុខាភិបាល៕

ដោយ៖ រិទ្ធី