AKP កំពង់ធំ ថ្ងៃទី១៤ ខែមិថុនា ឆ្នាំ២០២៥--

ឯកឧត្តម នួន ផារ័ត្ន អភិបាលខេត្តកំពង់ធំ បានមានប្រសាសន៍លើកឡើងថា ការសិក្សារៀនសូត្រត្រូវតែលះបង់ពេលវេលា ដើម្បីឱ្យមានជំនាញ និងចំណេះពិតប្រាកដក្នុងការយកទៅអនុវត្តនៅក្នុងអង្គភាពរបស់ខ្លួន ដោយមានការទទួលខុសត្រូវក្នុងឱកាសដែលឯកឧត្តមអញ្ជើញជាអធិបតីភាពបិទវគ្គបណ្ដុះបណ្ដាលស្ដីពីជំនាញឌីជីថលសម្រាប់កិច្ចការងាររដ្ឋបាលជូនមន្ត្រីរាជការនៃរដ្ឋបាលខេត្ត ក្រុង ស្រុកនិងឃុំ សង្កាត់នៃខេត្តកំពង់ធំ កាលពីរសៀលថ្ងៃទី១៣ ខែមិថុនា ឆ្នាំ២០២៥ នៅសាលប្រជុំវិទ្យាស្ថានពហុបច្ចេកទេសខេត្តកំពង់ធំ។

ឯកឧត្តម នួន ផារ័ត្ន បានមានប្រសាសន៍ថា ក្រោមការដឹកនាំដ៏ឆ្លាតវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់គោលដៅនៃបណ្ដុះបណ្ដាលកម្មវិធី១,៥លាននាក់ គឺរៀនឱ្យចប់ ឱ្យចេះ ឱ្យមានការងារ ដើម្បីពង្រឹងសមត្ថភាព និងចំណេះដឹងជូនដល់មន្ត្រី រាជការមកពីរដ្ឋបាលខេត្ត ក្រុង ស្រុក ឃុំ សង្កាត់ របស់រដ្ឋបាលខេត្តកំពង់ធំ លើជំនាញឌីជីថលដែលជាតម្រូវការចាំបាច់សម្រាប់ ពន្លឿនកិច្ចការរដ្ឋបាលប្រចាំថ្ងៃនិងអាចឱ្យមន្ត្រីរាជការបំពេញកិច្ចការរបស់ខ្លួនប្រកបដោយសុវត្ថិភាព និងការផ្តល់សេវាសាធារណៈ ប្រកបដោយប្រសិទ្ធភាពនិងប្រសិទ្ធផល ជាពិសេសចូលរួមកសាងមូលធនមនុស្សឌីជីថល នៅក្នុងវិស័យសាធារណៈស្របតាមគោលនយោបាយរបស់រាជរដ្ឋាភិបាល។

ឯកឧត្តម នួន ផារ័ត្ន បានជំរុញ និងលើកទឹកចិត្តដល់អ្នកចូលរួមទាំងអស់ សូមសិក្សារៀនសូត្រមានជំនាញចំណេះហើយ យកទៅប្រើប្រាស់ក្នុងអង្គភាពរបស់ខ្លួនប្រកបដោយភាពជោគជ័យ។ ក្រោយពីសិក្សារៀនសូត្រចប់ត្រូវផ្សព្វផ្សាយបន្ថែមដល់មន្ត្រីដែលពុំបានមកសិក្សារៀនសូត្រនេះ ឱ្យគាត់មានចំណេះជំនាញ និងបទពិសោធន៍បន្ថែមទៀត ក្នុងការធ្វើការងារបានរហ័សទាន់ពេលវេលា និងមានភាពត្រឹមត្រូវផងដែរ។

សូមបញ្ជាក់ថា វគ្គបណ្តុះបណ្តាលនេះមានរយៈពេល៤២ម៉ោង ដោយប្រើប្រាស់វិធីសាស្ត្របែបចម្រុះ ម៉ោងទ្រឹស្តី សិក្សា តាមរយៈអនឡាញ និងស្វ័យសិក្សានៅក្នុងប្រព័ន្ធអនឡាញ របស់បណ្ឌិតសភាបច្ចេកវិទ្យាឌីជីថលកម្ពុជា (CADT) និងម៉ោងអនុវត្តសិក្សាផ្ទាល់នៅខេត្តកំពង់ធំដោយមាន ៧មុខវិជ្ជាដូចជា÷ កុំព្យូទ័រចាំបាច់ (CE) អនឡាញចាំបាច់ (DE) សន្តិសុខសាយប័រ និងឯកជនភាព(CP) កម្មវិធីបង្កើតឯកសាររដ្ឋបាល (WP)កម្មវិធីបង្កើកសៀវភៅបញ្ជី(SS)បង្កើតមាតិកានីជីថលសម្រាប់ការធ្វើបង្ហាញ (DC)និងគោលនយោបាយឌីជីថល (DP)៕

ដោយ ស៊ុម វណ្ណា