AKP ភ្នំពេញ ថ្ងៃទី១៤ ខែមិថុនា ឆ្នាំ២០២៥--
ក្រោមកិច្ចសហប្រតិបត្តិការទ្វេភាគីរវាងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន និងស្ថានទូតជប៉ុនប្រចាំកម្ពុជា ឯកឧត្តមបណ្ឌិត ជួន ជីវិន រដ្ឋលេខាធិការក្រសួងអប់រំ យុវជន និងកីឡា បានដឹកនាំកិច្ចប្រជុំណែនាំបច្ចេកទេសដល់គណៈកម្មការអប្បមាទ គណៈមេប្រយោគមណ្ឌលសំណេរ គណៈកម្មការកណ្ដាលសំណេរ និងគណៈកម្មការអនុរក្ស នារសៀលថ្ងៃទី១៤ ខែមិថុនា ឆ្នាំ២០២៥ នៅវិទ្យាស្ថានភាសាបរទេស ដើម្បីត្រៀមរៀបចំដំណើរការសំណេរជាជំហានទី១ នៃការប្រឡងជ្រើសរើសនិស្សិត (MEXT) ទៅសិក្សានៅប្រទេសជប៉ុន សម្រាប់ឆ្នាំ២០២៦។

គួរបញ្ជាក់ផងដែរថា កម្មវិធីអាហារូបករណ៍របស់ក្រសួងអប់រំជប៉ុន (MEXT) បានចាប់ផ្តើមតាំងពីឆ្នាំ១៩៩២មក និងបានផ្តល់អាហារូបករណ៍ដល់និស្សិតកម្ពុជារហូតមកដល់ឆ្នាំ២០២៥នេះ បានចំនួន ៨២៥នាក់។ សម្រាប់កម្មវិធីអាហារូបករណ៍ MEXT 2026 ក្រសួងអប់រំ វប្បធម៌ វិទ្យាសាស្ត្រ កីឡា និងបច្ចេកវិទ្យា (MEXT) នៃប្រទេសជប៉ុនបានផ្តល់អាហារូបករណ៍ចំនួន៤ប្រភេទក្នុងកម្រិតនិស្សិតថ្នាក់ក្រោយឧត្តមសិក្សា និស្សិតថ្នាក់ឧត្តមសិក្សា និស្សិតថ្នាក់មធ្យមសិក្សាបច្ចេកទេស និងនិស្សិតថ្នាក់បណ្តុះបណ្តាលវិជ្ជាជីវៈ៕

ដោយ៖ ចាន់ សុភឿន (ប្រភព៖ ក្រសួងអប់រំ)