AKP ភ្នំពេញ ថ្ងៃទី១៥ ខែមិថុនា ឆ្នាំ២០២៥-- ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប នៅថ្ងៃទី១៤ ខែមិថុនា ឆ្នាំ២០២៥ បានដឹកនាំក្រុមការងារបច្ចេកទេសអន្តរក្រសួង សហការជាមួយមន្ទីរ អង្គភាពជំនាញពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ និងកងកម្លាំងបញ្ជាការស្រាលទាំង៣ បានបន្តចុះកំណត់និយាមកាបោះបង្គោលជំហាន២ ដំណាក់កាលទី១ បង្គោលព្រំដីតំបន់កាត់ឆ្វៀល (តំបន់១ និងតំបន់២ ស្ថិតក្នុងតំបន់៣) ក្នុងភូមិសាស្រ្តខេត្តកំពង់ធំ។

សូមជម្រាបជូនផងដែរថា នៅខេត្តកំពង់ធំ អាជ្ញាធរទន្លេសាបមានផែនការបោះបង្គោលព្រំដីតំបន់កាត់ឆ្វៀល (តំបន់១ និងតំបន់២ ស្ថិតក្នុងតំបន់៣) ចំនួនប្រមាណ ៣ ០៣៦ បង្គោល។ ដោយឡែកសម្រាប់ឆ្នាំ២០២៥នេះ អាជ្ញាធរទន្លេសាប ជ្រើសរើសស្រុកតាំងគោកនៃខេត្តកំពង់ធំ សម្រាប់បោះបង្គោលព្រំដីតំបន់កាត់ឆ្វៀលជំហាន២ ដំណាក់កាលទី១ ចំនួន ៣៩៨ បង្គោល សម្រាប់បង្គោលនៅសល់នឹងបន្តបោះនៅឆ្នាំបន្តបន្ទាប់រហូតដល់ចប់រួចរាល់១០០ភាគរយ៕

ដោយ ណយ នឿន (ប្រភព៖ អាជ្ញាធរទន្លេសាប)