AKP បន្ទាយមានជ័យ ថ្ងៃទី៣១ ខែកក្កដា ឆ្នាំ២០២៥-- វេទិកាខេត្តបន្ទាយមានជ័យបានប្រែក្លាយជាទីកន្លែងពោរពេញដោយក្តីសោកសៅ និងមោទកភាពដ៏ក្រៃលែងក្នុងពិធីដង្ហែក្បួនកាន់ទុក្ខ និងពិធីបង្សុកូលឧទ្ទិសដល់វីរកងទ័ពជួរមុខ ដែលបានពលីជីវិតក្នុងសមរភូមិបុព្វហេតុការពារបូរណភាពទឹកដីកម្ពុជា កាលពីរសៀលថ្ងៃពុធ ទី៣០ ខែកក្កដា ឆ្នាំ២០២៥ ដោយពិធីដ៏មានអត្ថន័យជ្រាលជ្រៅនេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់ឯកឧត្ដម ប្ល៉ែក វ៉ារី ប្រធានក្រុមប្រឹក្សាខេត្ត និងឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងមានការអញ្ជើញចូលរួមយ៉ាងច្រើនកុះករពីសំណាក់មន្ត្រីរាជការ កងកម្លាំងប្រដាប់អាវុធ ព្រះសង្ឃ សិស្ស និស្សិត និងប្រជាពលរដ្ឋគ្រប់ស្រទាប់វណ្ណៈ។

ពិធីកាន់ទុក្ខនេះត្រូវបានរៀបចំឡើងយ៉ាងខ្ជាប់ខ្ជួនទៅតាមប្រពៃណីព្រះពុទ្ធសាសនា និងបង្ហាញនូវការគោរពដឹងគុណយ៉ាងជ្រាលជ្រៅចំពោះវីរភាពរបស់កងទ័ព។ កម្មវិធីបានចាប់ផ្ដើមឡើងដោយការសូត្របទពង្សសាវតា ដើម្បីរំឭកពីប្រវត្តិសាស្ត្រនៃការតស៊ូ និងការលះបង់របស់បុព្វបុរសខ្មែរក្នុងការការពារទឹកដី។ បន្ទាប់មក គឺការថ្លែងសាររំលែកទុក្ខជាមួយក្រុមគ្រួសារសពវីរកងទ័ពដែលបានធ្វើឱ្យបរិយាកាសកាន់តែស្ងប់ស្ងាត់ និងសោកសៅ។ វត្តមានរបស់ថ្នាក់ដឹកនាំខេត្ត និងការថ្លែងសារនេះបានបង្ហាញពីការយកចិត្តទុកដាក់ និងការចងចាំជានិច្ចនូវគុណបំណាច់របស់កងទ័ពដែលបានបាត់បង់ជីវិត។ ពិធីបន្ទាប់គឺគោរពវិញ្ញាណក្ខន្ធវីរកងទ័ព ដោយអង្គពិធីទាំងមូលបានឈរស្ងៀមស្ងាត់មួយសន្ទុះ ដើម្បីឧទ្ទិសបួងសួងដល់វិញ្ញាណក្ខន្ធយុទ្ធជនពលីទាំងអស់។ បន្ទាប់ពីនោះ ព្រះសង្ឃបានចាប់ផ្ដើមនមស្ការព្រះរតនត្រ័យ សមាទានសីល ដើម្បីជាការបួងសួងសុំសេចក្តីសុខសន្តិភាព និងឧទ្ទិសផលបុណ្យជូនដល់វីរយុទ្ធជន។ ជាពិសេស ពិធីបូជាប្រទីបបានរំលេចឡើងនូវភាពស្រស់ស្អាតលាយឡំនឹងភាពសោកសៅ ដោយប្រទីបជាច្រើនត្រូវបានអុជបំភ្លឺជានិមិត្តរូបនៃការចងចាំ និងការដឹងគុណចំពោះវីរៈជន។ ព្រះសង្ឃគង់នៅទីនោះ បាននិមន្ត ស្វាធ្យាយព្រះសត្តប្បករណាភិធម្ម ៧គម្ពីរ ដែលជាធម៌ដ៏ឧត្ដុង្គឧត្ដម ដើម្បីរំដោះទុក្ខសោក និងបញ្ជូនផលបុណ្យដល់វិញ្ញាណក្ខន្ធវីរយុទ្ធជនទាំងអស់។ ពិធីនេះក៏មានការសមាធិចំនួន១៥នាទី និងផ្តល់ឱវាទពីព្រះសង្ឃ ព្រមទាំងការ ផ្សាយមេត្តាចិត្ត និងឧទ្ទិសបុណ្យកុសលដល់វិញ្ញាណក្ខន្ធអ្នកពលី។

ក្នុងឱកាសដ៏ឧត្ដុង្គឧត្ដមនេះ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ដោយក្ដីរំភើប និងមោទកភាពយ៉ាងដូច្នេះថា «យើងខ្ញុំជាថ្នាក់ដឹកនាំខេត្ត ក៏ដូចជាប្រជាពលរដ្ឋទាំងអស់ មិនអាចបំភ្លេចបានឡើយនូវគុណបំណាច់ដ៏ថ្លៃថ្លារបស់វីរៈកងទ័ពជួរមុខ ដែលបានលះបង់ជីវិត ដើម្បីការពារបូរណភាពទឹកដី និងរក្សាសុខសន្តិភាពជូនជាតិមាតុភូមិ ចាប់ពីថ្ងៃទី២៤ ខែកក្កដា រហូតដល់ថ្ងៃទី២៨ ខែកក្កដា ឆ្នាំ២០២៥។ ការពលីរបស់ពួកគាត់គឺជាមរតកដ៏អស្ចារ្យដែលកូនចៅជំនាន់ក្រោយត្រូវតែចងចាំ និងបន្តថែរក្សាឱ្យបានគង់វង្សជារៀងរហូត។ ពិធីនេះ គឺជាការបង្ហាញនូវកតញ្ញូតាធម៌ដ៏ជ្រាលជ្រៅ និងការប្តេជ្ញាចិត្តដ៏មុតមាំរបស់យើងក្នុងការបន្តកសាង និងការពារជាតិឱ្យបានរឹងមាំតទៅមុខទៀត។»

ចំណែកឯប្រជាពលរដ្ឋ សិស្ស និស្សិត ក៏ដូចជាព្រះសង្ឃដែលបាននិមន្ត និងអញ្ជើញចូលរួមក្នុងពិធីនេះ ក៏បានសម្តែងនូវចំណាប់អារម្មណ៍រៀងៗខ្លួន។ លោក គឹម សុផល ប្រជាពលរដ្ឋម្នាក់បានលើកឡើងថា «ខ្ញុំពិតជាមានអារម្មណ៍រំជួលចិត្តយ៉ាងខ្លាំងនៅពេលបានចូលរួមពិធីនេះ។ ពួកគាត់ពិតជាវីរបុរសពិតប្រាកដដែលបានការពារជាតិយើង។ ខ្ញុំសូមឧទ្ទិសបួងសួងឱ្យវិញ្ញាណក្ខន្ធពួកគាត់បានទៅដល់សុគតិភព។» ចំណែកឯកញ្ញា លីណា ជានិស្សិតម្នាក់បានបន្ថែមថា «ពិធីនេះបានរំឭកខ្ញុំអំពីការលះបង់ដ៏ធំធេងរបស់កងទ័ពយើង។ ក្នុងនាមជានិស្សិត ខ្ញុំនឹងខិតខំរៀនសូត្រឱ្យពូកែ ដើម្បីរួមចំណែកអភិវឌ្ឍន៍ប្រទេសជាតិឱ្យស័ក្តិសមនឹងការលះបង់របស់ពួកគាត់។»

ពិធីដង្ហែក្បួនកាន់ទុក្ខ និងពិធីបង្សុកូលឧទ្ទិសដល់វីរកងទ័ពជួរមុខនេះ មិនត្រឹមតែជាការគោរពវិញ្ញាណក្ខន្ធប៉ុណ្ណោះទេ ប៉ុន្តែក៏ជាសារមួយដ៏មានអត្ថន័យជ្រាលជ្រៅសម្រាប់ប្រជាជាតិទាំងមូល។ វាជាការរម្លឹកដល់កូនខ្មែរគ្រប់រូបឱ្យចងចាំជានិច្ចនូវការលះបង់ដ៏ធំធេងរបស់វីរជនដែលបានពលីជីវិតដើម្បីបុព្វហេតុជាតិមាតុភូមិ។ «ខ្ញុំសូមកាន់ទុក្ខចំពោះកងទ័ពវីរជនដ៏អង់អាចក្លាហានដែលបានពលីជីវិត ដើម្បីការពារជាតិ សូមដួងវិញ្ញាណក្ខន្ធកងទ័ពវីរជនដ៏អង់អាចក្លាហាន សូមឱ្យបានទៅដល់ឋានស្ងប់ចុះ ក្នុងនាមយើងខ្ញុំជាកូនខ្មែរ សូមគោរពដឹងគុណ និងចងចាំជាប្រវត្តិសាស្ត្រក្នុងប្រទេសកម្ពុជា។» គឺជាពាក្យពេចន៍ដែលបានឆ្លុះបញ្ចាំងពីអារម្មណ៍រួមរបស់ប្រជាពលរដ្ឋខ្មែរទាំងមូល។

សូមបញ្ជាក់ថា ព្រឹត្តិការណ៍ដ៏សំខាន់នេះបានបង្ហាញឱ្យឃើញយ៉ាងច្បាស់អំពីស្មារតីសាមគ្គីភាព និងការដឹងគុណរបស់ប្រជាជនកម្ពុជាចំពោះវីរភាពរបស់កងទ័ព។ វាជាមេរៀនប្រវត្តិសាស្ត្រមួយដែលបន្តបណ្ដះស្មារតីស្នេហាជាតិ ការលះបង់ និងការរួបរួមគ្នាក្នុងការកសាង និងការពារប្រទេសជាតិឱ្យបានគង់វង្សជារៀងរហូតតទៅ៕

ដោយ ឈុន សារ៉ាត