AKP បន្ទាយមានជ័យ ថ្ងៃទី៣១ ខែកក្កដា ឆ្នាំ២០២៥--ឯកឧត្តម អ៊ុំ រាត្រី អភិបាលខេត្តបន្ទាយមានជ័យ កាលពីរសៀលថ្ងៃទី៣០ ខែកក្កដា ឆ្នាំ២០២៥ បានដឹកនាំក្រុមការងារចុះសួរសុខទុក្ខ និងនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ទៅចែកជូនដល់បងប្អូនជនភៀសសឹកជិត៥០០គ្រួសារ ដែលបានជម្លៀសខ្លួនពីតំបន់ប្រយុទ្ធនៅខេត្តឧត្តរមានជ័យ និងខេត្តព្រះវិហារ មកកាន់ទីតាំងសុវត្ថិភាព ក្នុងស្រុកព្រះនេត្រព្រះ។

ក្នុងនាមជាតំណាងដ៏ខ្ពង់ខ្ពស់របស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ឯកឧត្តមអភិបាលខេត្តបានសម្តែងក្តីនឹករលឹកពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចធិបតី ព្រមទាំងលោកជំទាវបណ្ឌិត ជូនចំពោះបងប្អូនជនភៀសសឹកទាំងអស់។

ឯកឧត្តមអភិបាលបានបញ្ជាក់ថា រាជរដ្ឋាភិបាល ក្រោមការដឹកនាំរបស់សម្តេចធិបតី តែងតែយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋគ្រប់កាលៈទេសៈ ជាពិសេសបងប្អូនដែលរងផលប៉ះពាល់ដោយសារជម្លោះនៅជួរមុខ។ ឯកឧត្តមបានលើកឡើងថា ការចាត់ចែងនាំយកអំណោយមកជូននេះគឺដើម្បីជួយសម្រាលការលំបាក និងដោះស្រាយបញ្ហាជីវភាពប្រចាំថ្ងៃរបស់បងប្អូនក្នុងអំឡុងពេលស្នាក់នៅបណ្តោះអាសន្ន។

ក្នុងឱកាសនោះដែរ ឯកឧត្តម អ៊ុំ រាត្រី ក៏បានថ្លែងអំណរគុណដល់វីរភាពរបស់កងទ័ពជួរមុខដែលបានលះបង់គ្រប់បែបយ៉ាង ដើម្បីការពារបូរណភាពទឹកដី ធ្វើឱ្យមានការសម្រេចបាននូវបទឈប់បាញ់គ្នាដោយគ្មានលក្ខខណ្ឌមួយជំហាន។ ឯកឧត្តមបានអំពាវនាវដល់បងប្អូនជនភៀសសឹកទាំងអស់ ឱ្យបន្តជឿជាក់លើការដឹកនាំរបស់រាជរដ្ឋាភិបាល និងកិច្ចខិតខំប្រឹងប្រែងរបស់កងទ័ព ដែលប្តេជ្ញាធ្វើការងារបន្តដើម្បីឱ្យស្ថានការណ៍វិលត្រឡប់មកសភាពធម្មតាវិញក្នុងពេលឆាប់ៗ។

សូមបញ្ជាក់ថា កាយវិការដ៏សប្បុរសធម៌នេះបានបង្ហាញយ៉ាងច្បាស់ពីការយកចិត្តទុកដាក់ និងភាពកក់ក្តៅរបស់ថ្នាក់ដឹកនាំជាតិចំពោះប្រជាពលរដ្ឋគ្រប់រូប ក្នុងពេលជួបការលំបាក៕

ដោយ ឈុន សារ៉ាត