AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥-- លោក ម៉ប់ ធារិទ្ធ ប្រធានមន្ទីរអភិវឌ្ឍន៍ជនបទខេត្តព្រះវិហារ បានអញ្ជើញចុះពិនិត្យបន្ទាន់នូវដំណើរការផ្គត់ផ្គង់ទឹកពីអណ្តូងស្នប់ និងស្ថានភាពអនាម័យនៅមណ្ឌលសុវត្ថិភាពវត្តទួលអណ្ដែត ស្ថិតនៅភូមិថ្នល់បែក ឃុំថ្មី ស្រុកគូលែន កាលពីថ្ងៃពុធ ទី៣០ ខែកក្កដា ឆ្នាំ២០២៥។ ទន្ទឹមនឹងនេះ លោកប្រធានមន្ទីរបានចាប់មន្ត្រី៤រូប ដើម្បីប្រចាំការនៅមណ្ឌលសុវត្ថិភាពជនភៀសសឹក វត្តឧត្តមគិរីទួលអណ្តែត ហៅវត្តថ្នល់បែក ផងដែរ។  

នាថ្ងៃនោះ លោកប្រធានមន្ទីរ រួមជាមួយក្រុមការងារ បានទទួលអំណោយមនុស្សធម៌ជាសម្ភារពីអង្គការយូនីសេហ្វ និងអង្គការ Plan International ដើម្បីផ្តល់ជូនរដ្ឋបាលខេត្ត ធ្វើការចែកចាយជូនជនភៀសសឹកបន្តដែល រួមមាន៖ ធុងចម្រោះសេរ៉ាមិក១០០ធុង ធុងទឹកជ័រយួរចំនុះ២០លីត្រ ចំនួន៨០០ធុង ប៊ីដុងជ័រយួរចំណុះ២០លីត្រ ចំនួន២៥០ប៊ីដុង សាប៊ូដុំលាងដៃចំនួន១៥០០០ដុំ សាប៊ូម៉្សៅកញ្ចប់ចំនួន២៥០កញ្ចប់ សំឡីអនាម័យចំនួន៥០កេះ ធុងចម្រោះទឹកចំនួន២១ធុង ដើម្បីប្រគល់ជូនរដ្ឋបាលសាលាខេត្តព្រះវិហារសម្រាប់ចែកជូនដល់ជនភៀសសឹក វត្តឧត្តមគិរីទួលអណ្តែត ហៅវត្តថ្នល់បែក ស្ថិតនៅភូមិថ្នល់បែក ឃុំថ្មី ស្រុកគូលែន៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)