AKP ភ្នំពេញ ថ្ងៃទី០៨ ខែតុលា ឆ្នាំ២០២៥-- ស្ថាប័នមនុស្សធម៌កាកបាទក្រហមកម្ពុជានឹងរៀបចំកម្មវិធីរត់ប្រណាំងចម្ងាយ៥គីឡូម៉ែត ដើម្បីអបអរសាទរទិវាពិភពលោកសង្គ្រោះបឋម ២០២៥ “រត់ដើម្បីសុខភាព សន្តិភាព និងការប្រែប្រួលអាកាសធាតុ” ដែលនឹងធ្វើឡើងនៅសួនច្បារជិតសណ្ឋាគារសុខា ក្នុងខណ្ឌជ្រោយចង្វារ រាជធានីភ្នំពេញ នៅព្រឹកថ្ងៃទី១២ ខែតុលា ឆ្នាំ២០២៥ ខាងមុខ។ នេះបើតាមសេចក្តីប្រកាសព័ត៌មានរបស់កាកបាទក្រហមកម្ពុជា។ 

សេចក្តីប្រកាសព័ត៌មានបានលើកឡើងថា កាកបាទក្រហមកម្ពុជាក្រោមម្លប់គង់ប្រថាប់ដ៏ឧត្តុង្គឧត្តមនៃសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន មានកិត្តិយស និងសេចក្តីរីករាយ សូមគោរពជម្រាបជូន សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាង កញ្ញា និងបងប្អូនជនរួមជាតិមេត្តាជ្រាបថា កាកបាទក្រហមកម្ពុជានឹងរៀបចំកម្មវិធីរត់ប្រណាំងចម្ងាយ៥គីឡូម៉ែត ដើម្បីអបអរសាទរទិវាពិភពលោកសង្គ្រោះបឋម ២០២៥ “រត់ដើម្បីសុខភាព សន្តិភាព និងការប្រែប្រួលអាកាសធាតុ” ដែលនឹងប្រារព្ធធ្វើឡើងនៅខណ្ឌជ្រោយចង្វារ (សួនច្បារជិតសណ្ឋាគារសុខា) រាជធានីភ្នំពេញ ចាប់ពីម៉ោង ៦៖០០នាទីព្រឹក ដល់ ម៉ោង ១០៖០០នាទីព្រឹក ថ្ងៃអាទិត្យ ទី១២ ខែតុលា ឆ្នាំ២០២៥។

អាស្រ័យហេតុនេះ កាកបាទក្រហមកម្ពុជាសូមជម្រាបអញ្ជើញសាធារណជន ជាពិសេសយុវជន ដែលមានបំណងចូលរួមព្រឹត្តិការណ៍ខាងលើនេះ សូមមេត្តាចុះឈ្មោះតាមប្រព័ន្ធអនឡាញ ចាប់ពីពេលផ្សាយដំណឹងនេះ ដល់ថ្ងៃទី១០ ខែតុលា ឆ្នាំ២០២៥ រហូតគ្រប់ចំនួនកំណត់ត្រឹម ៧០០នាក់។ កម្មវិធីខាងលើនេះ កំណត់អ្នកចូលរួមចំនួន ៧០០នាក់ ដែលនឹងទទួលបាន អាវយឺត១ ស្លាកលេខសម្រាប់រត់ និងវិញ្ញាបនបត្រ Electronic តាមប្រពន្ធអនឡាញពីកាកបាទក្រហមកម្ពុជា។

កាកបាទក្រហមកម្ពុជាបានគូសបញ្ជាក់ថា ការចូលរួមរបស់សាធារណជន និងយុវជនក្នុងព្រឹត្តិការណ៍នេះ គឺជាការចូលរួមលើកកម្ពស់ការយល់ដឹងអំពីសារសំខាន់នៃចំណេះដឹងសង្គ្រោះបឋម និងផលប៉ះពាល់ដោយសារការប្រែប្រួលអាកាសធាតុ ជាមួយនឹងការគាំទ្រសេវាកម្មមនុស្សធម៌ និងកម្មវិធីកសាងភាពធន់។ ជាមួយគ្នានេះនឹងលើកទឹកចិត្តដល់អ្នកចូលរួមគ្រប់វ័យឱ្យឆ្លងកាត់ការបណ្តុះបណ្តាលបច្ចេកទេសសង្គ្រោះបឋម និងការប្រែប្រួលអាកាសធាតុ ជាពិសេសជាពិសេសជំនាញ CPR (ចលនាបេះដូងខាងក្រៅ) ដើម្បីចូលរួមកាត់បន្ថយអត្រាស្លាប់ភ្លាមៗដោយសារគាំងបេះដូង ជួយសហគមន៍មានសុខភាពល្អ ទាំងផ្លូវកាយ និងផ្លូវចិត្ត និងឆ្លុះបញ្ចាំងអំពីការចូលរួមថែរក្សា សន្តិភាពក្នុងការដោះស្រាយបញ្ហាប្រឈមនានាក្នុងពេលបច្ចុប្បន្ន៕

ដោយ៖ ចាន់ សុភឿន (ប្រភព៖ កាកបាទក្រហមកម្ពុជា)