AKP ភ្នំពេញ ថ្ងៃទី០៨ ខែតុលា ឆ្នាំ២០២៥-- ឯកឧត្តម អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា និងជាតំណាងជាតិសម្រាប់ក្រុមប្រឹក្សាសហគមន៍សង្គម-វប្បធម៌អាស៊ានរបស់កម្ពុជា ថ្ងៃទី០៧ ខែតុលា ឆ្នាំ២០២៥ បានដឹកនាំប្រតិភូកម្ពុជា ចូលរួមវេទិកាកម្រិតខ្ពស់សហគមន៍សង្គម-វប្បធម៌អាស៊ានឆ្នាំ២០២៥ នៅប្រទេសម៉ាឡេស៊ី ដែលមានការចូលរួមពីរដ្ឋមន្ត្រីនៃក្រុមប្រឹក្សាសហគមន៍សង្គម-វប្បធម៌អាស៊ាន រដ្ឋមន្ត្រីសហគមន៍សង្គម-វប្បធម៌អាស៊ានប្រទេសទីម័រឡេសស្តេ ក្នុងនាមជាប្រទេសសង្កេតការណ៍អាស៊ាន អគ្គលេខាធិការអាស៊ាន  ឧត្តមមន្ត្រីសហគមន៍សង្គម-វប្បធម៌អាស៊ាន និងគណៈប្រតិភូនៃរដ្ឋសមាជិកអាស៊ាន។

វេទិកានេះមានគោលបំណងចំនួន៣ រួមមាន៖ ១. ប្រមូល និងចែករំលែកឧត្តមានុវត្តន៍ ការអនុវត្តល្អ និងព្រឹត្តិការណ៍សំខាន់ៗនៃផែនការចក្ខុវិស័យសហគមន៍សង្គម-វប្បធម៌អាស៊ានឆ្នាំ២០២៥ ជាពិសេសការប្រមូលបញ្ហាប្រឈមក្នុងតំបន់ និងសកល។ ២. គូសបញ្ជាក់វិធីសាស្ត្រឆ្ពោះទៅមុខ និងទិសដៅយុទ្ធសាស្ត្រក្នុងការទាក់ទាញភាគីពាក់ព័ន្ធ ពង្រឹងភាពធន់ និងការសម្របខ្លួនសម្រាប់អនាគត តាមរយៈការលើកកម្ពស់ការរៀបចំកម្មវិធី និងគោលនយោបាយប្រកបដោយប្រសិទ្ធភាព និង៣. បង្ហាញពីភាពចម្រុះនៃវប្បធម៌ដ៏សម្បូរបែបរបស់អាស៊ាន និងអត្តសញ្ញាណរួមគ្នាក្នុងការលើកកម្ពស់ការអភិវឌ្ឍប្រកបដោយបរិយាបន្ន និងចីរភាព។

ក្នុងវេទិកានេះ ប្រតិភូកម្ពុជាបានបង្ហាញពីចំណុចអាទិភាព៣ចំណុច ក្នុងការពង្រឹងការអភិវឌ្ឍសមត្ថភាពយុវជន និងបង្កើនការវិនិយោគលើសកម្មភាពអាកាសធាតុ និងឧស្សាហកម្មវប្បធម៌ច្នៃប្រឌិត រួមមាន៖ ១. ការអប់រំ៖ រៀបចំកម្មវិធីសិក្សាគ្រប់កម្រិតឱ្យស្របទៅនឹងតម្រូវការសតវត្សរ៍ទី២១ ដោយបញ្ចូលជំនាញវិភាគបម្រែបម្រួលអាកាសធាតុ អភិវឌ្ឍន៍ជំនាញបៃតង និងឧស្សាហកម្មទំនើប តាមរយៈការរៀបចំប្រព័ន្ធសាលារៀនមេត្រី ការផ្សារភ្ជាប់ទ្រឹស្តីទៅនឹងការអនុវត្តជាក់ស្តែង និងការផ្សារភ្ជាប់ជំនាញបៃតងទៅនឹងការងារបៃតងដែលស្របទៅនឹងឧស្សាហកម្មការងារ។ ២. ការចូលរួម៖ រៀបចំគោលនយោបាយ និងផ្តល់ឱកាសដល់យុវជនក្នុងវេទិកាតំបន់ និងអន្តរជាតិ ដើម្បីបង្ហាញពីសក្តានុពល បង្កើតគំនិតផ្តួចផ្តើមថ្មីៗ និងរៀបចំសកម្មភាពសង្គមក្នុងការចូលរួមការពារបរិស្ថាន ការប្រែប្រួលអាកាសធាតុ និងឧស្សាហកម្ម-សេដ្ឋកិច្ចការងារ និង ៣. កាលានុវត្តភាព៖ ភាពជាសហគ្រិនរបស់យុវជន និងកិច្ចសហប្រតិបត្តិការជាមួយគ្រប់ភាគីពាក់ព័ន្ធគឺជាចំណុចស្នូលក្នុងការជំរុញ និងបង្កើនការអភិវឌ្ឍសេដ្ឋកិច្ច សង្គម និងឧស្សាហកម្ម បណ្តុះអ្នកបន្តវេនជំនាន់ក្រោយ ពិសេសកម្មភាពថែទាំបរិស្ថាន ការប្រែប្រួលអាកាសធាតុ ការវិវដ្តនៃសេដ្ឋកិច្ចបៃតង និងការគ្រប់គ្រងធនធានធម្មជាតិប្រកបដោយចីរភាព តាមរយៈការលើកកម្ពស់កិច្ចសហប្រតិបត្តិការវិស័យបរិស្ថានប្រកបដោយអត្ថន័យនិងលទ្ធផលសម្រាប់អនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)