AKP សៀមរាប ថ្ងៃទី១០ ខែឧសភា ឆ្នាំ២០២៦ -- បងប្អូនក្រុមគ្រួសារកងទ័ពចំនួន ៥០០គ្រួសារ នៃបញ្ជាការដ្ឋានយោធភូមិភាគទី៤ ខេត្តសៀមរាប នៅព្រឹកថ្ងៃទី១០ ខែឧសភា ឆ្នាំ២០២៦នេះ បានទទួលអំណោយជាគ្រឿងឧបភោគបរិភោគ សម្ភារប្រើប្រាស់ និងថវិកាពី លោកជំទាវ នេត ធីតាវិឈុណា អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងក្រុមការងារ លោក តាំង គីមឡេង ដើម្បីជាការចូលរួមសម្រួលបន្ទុកដល់ជីវភាពរស់នៅប្រចាំថ្ងៃ ជាពិសេសបងប្អូនជាភរិយាវីរកងទ័ពដែលកំពុងមានទម្ងន់ និងទើបសម្រាលកូន។

បើតាមលោក តាំង គីមឡេង ក្នុងនាមក្រុមការងារ បានសម្ដែងនូវមោទនភាពចំពោះវីរកងទ័ពដែលកំពុងឈរជើងការពារបូរណភាពទឹកដីនៅតាមខ្សែបន្ទាត់ព្រំដែន និងគ្រប់ទិសទី ដោយបានប្រសិទ្ធពរជ័យឱ្យបងប្អូនមានសុខភាពល្អ និងទទួលបានជោគជ័យគ្រប់ភារកិច្ចការពារជាតិមាតុភូមិ។ ពិតណាស់ ស្មារតី “ជួរមុខ និងជួរក្រោយនៅក្បែរគ្នា” គឺជាកម្លាំងចិត្តដ៏សំខាន់សម្រាប់កងទ័ពដែលកំពុងបំពេញបេសកកម្មការពារអធិបតេយ្យភាពជាតិ។ 

លោក តាំង គីមឡេង បន្តថា សកម្មភាពមនុស្សធម៌នាពេលនេះ គឺជាការឆ្លុះបញ្ចាំងពីការយកចិត្តទុកដាក់ខ្ពស់បំផុតរបស់ សម្តេចតេជោ ហ៊ុន សែន ជាពិសេសការយកចិត្តទុកដាក់ផ្ទាល់ពីសំណាក់ សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលតែងតែគិតគូរពីសុខទុក្ខ និងជីវភាពរស់នៅរបស់បងប្អូនកងទ័ពគ្រប់វិនាទី។ លោកក៏សូមថ្លែងអំណរគុណដល់លោកជំទាវ នេត ធីតាវិឈុណា ដែលជាចំណែកដ៏សំខាន់ក្នុងការសម្របសម្រួល ឱ្យកម្មវិធីនេះលេចចេញជារូបរាងឡើង និងបាននាំយកនូវទឹកចិត្តសប្បុរសធម៌ របស់បងប្អូនខ្មែរពីគ្រប់ទិសទីមកដល់ដៃគ្រួសារកងទ័ពដោយផ្ទាល់ ដែលនេះជាការប្ដេជ្ញាចិត្តខ្ពស់រួមគ្នា ក្នុងការការពារទឹកដីឱ្យបានគង់វង្សក្រោមម្លប់សន្តិភាព។

មានប្រសាសន៍ក្នុងឱកាសនោះ លោកជំទាវ នេត ធីតាវិឈុណា បានបង្ហាញថា ក្រោមការដឹកនាំដ៏ឈ្លាសវៃរបស់ សម្ដេចមហាបវរធិបតី ហ៊ុន ម៉ាណែត កម្ពុជាបានបង្ហាញនូវការពិត និងទាមទារយុត្តិធម៌ដោយជោគជ័យ ក្នុងកិច្ចប្រជុំកំពូលអាស៊ានលើកទី៤៤ កន្លងទៅ ក្នុងគោលដៅបញ្ជាក់ឱ្យពិភពលោកបានឃើញពីការខិតខំរក្សាសន្តិសុខ និងសន្តិភាពតាមបន្ទាត់ព្រំដែន។ លោកជំទាវក៏បានថ្លែងបញ្ជាក់ពីជំហរដ៏រឹងមាំរបស់កម្ពុជាលើឆាកអន្តរជាតិ តាមរយៈការប្រើប្រាស់យន្តការការទូត និងច្បាប់អន្តរជាតិ ដើម្បីការពារផលប្រយោជន៍ជាតិ។

លោកជំទាវ នេត ធីតាវិឈុណា មានប្រសាសន៍ថា ថ្នាក់ដឹកនាំក្រសួងការបរទេស អង្គទូត និងមន្ត្រីការទូតកម្ពុជាប្រចាំបរទេស បានខិតខំប្រឹងប្រែងយ៉ាងសកម្មលើឆាកអន្តរជាតិ ដើម្បីទាមទារយុត្តិធម៌ និងលើកកម្ពស់កិត្យានុភាពជាតិក្នុងរយៈពេលជិតមួយឆ្នាំកន្លងមកនេះ។ លោកជំទាវក៏បានអំពាវនាវដល់គ្រួសារវីរកងទ័ព និងប្រជាពលរដ្ឋទាំងអស់ ឱ្យបន្តផ្ដល់ទំនុកចិត្ត និងជាកម្លាំងចិត្តដល់រាជរដ្ឋាភិបាល និងកងទ័ពដែលកំពុងការពារបូរណភាពទឹកដី។ ជាពិសេសស្មារតីស្នេហាជាតិ និងការរួបរួមគ្នាជាធ្លុងមួយក្រោមការដឹកនាំរបស់ សម្ដេចតេជោ ហ៊ុន សែន និង សម្តេចធិបតី ហ៊ុន ម៉ាណែត គឺជាគ្រឹះដ៏រឹងមាំនៃសន្តិភាព។

លោកជំទាវអនុរដ្ឋលេខាធិការ ក៏បានលើកឡើងថា ទន្ទឹមនឹងសមិទ្ធផលការទូត លោកជំទាវក៏បានសង្កត់ធ្ងន់លើភាពរឹងមាំនៃជួរមុខ គឺអាស្រ័យលើការគាំទ្រដ៏សកម្មពីជួរក្រោយ។ ជាពិសេស ក្នុងឱកាសទិវាបុណ្យម្ដាយ ១០ ឧសភា នេះ លោកជំទាវក៏បានសម្ដែងនូវការដឹងគុណ ចំពោះស្ត្រីជាមាតា ដែលបានលះបង់ និងជាបង្អែកដ៏រឹងមាំសម្រាប់វីរកងទ័ពកម្ពុជាគ្រប់រូប និងការប្ដេជ្ញាចិត្តរួមគ្នាក្នុងការថែរក្សាសុខសន្តិភាព និងការអភិវឌ្ឍជាតិឱ្យកាន់តែរីកចម្រើនតទៅមុខទៀត។

ក្នុងនាមកងកម្លាំងដែលឈរជើងនៅជួរមុខ និងក្រុមគ្រួសារកងទ័ពទាំងអស់ នៃយោធភូមិភាគទី៤ ឧត្តមសេនីយ៍ទោ អៀម ប៊ុណ្ណា មេបញ្ជាការរង យោធភូមិភាគទី៤ បានថ្លែងអំណរគុណយ៉ាងជ្រាលជ្រៅចំពោះ លោកជំទាវ នេត ធីតាវិឈុណា អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ព្រមទាំង លោក តាំង គីមឡេង និងក្រុមការងារ ដែលតែងតែជួយគិតគូរពីសុខទុក្ខរបស់កងទ័ពនៃយើង។ ជាពិសេសកន្លងមក លោកជំទាវអនុរដ្ឋលេខាធិការ និងក្រុមការងារ តាំង គីមឡេង តែងបានចូលរួមយ៉ាងសកម្មជួយឧបត្ថម្ភគាំទ្រជាសម្ភារប្រើប្រាស់ គ្រឿងឧបភោគបរិភោគ និងថវិកាជូនដល់ក្រុមគ្រួសារកងទ័ពរបស់កងទ័ពជួរមុខ ដែលកំពុងមានភារកិច្ចការពារនៅតាមខ្សែបន្ទាត់ព្រំដែនជួរមុខ៕

ដោយ ឃុត សៅ