AKP ភ្នំពេញ ថ្ងៃទី១១ ខែឧសភា ឆ្នាំ២០២៦ -- សមាគមប្រជាជាតិអាស៊ីអាគ្នេយ៍ (អាស៊ាន) កំពុងស្វែងយល់ពីសំណើមួយដើម្បីបង្កើតយន្តការស្តុកប្រេងក្នុងតំបន់ ដែលពាក់ព័ន្ធនឹងការចូលរួមពីវិស័យឯកជន ដែលជាផ្នែកមួយនៃកិច្ចខិតខំប្រឹងប្រែងរយៈពេលវែងដើម្បីពង្រឹងសន្តិសុខថាមពល និងបង្កើនភាពធន់របស់តំបន់។

លោក ចូហារី អាប់ឌុល ហ្កានី (Johari Abdul Ghani) រដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្មម៉ាឡេស៊ី បាននិយាយថា សំណើដើម្បីបង្កើតក្របខ័ណ្ឌនេះត្រូវបានដាក់ជូនក្នុងអំឡុងពេលកិច្ចប្រជុំអាស៊ានដែលបានធ្វើឡើងនៅទីក្រុងសេប៊ូរបស់ប្រទេសហ្វីលីពីនកាលពីពេលថ្មីៗនេះ។

លោកបាននិយាយថា គំនិតផ្តួចផ្តើមនេះនឹងតម្រូវឱ្យមានការចូលរួមពីវិស័យឯកជនយ៉ាងខ្លាំង ព្រោះរដ្ឋាភិបាលតែម្នាក់ឯងនឹងមិនអាចដាក់ឱ្យដំណើរការយន្តការបែបនេះប្រកបដោយប្រសិទ្ធភាពនោះទេ។

លោក ចូហារី បាននិយាយថា ក្របខ័ណ្ឌដែលបានស្នើឡើងអាចចាប់ផ្តើមជាមួយនឹងការចូលរួមពីរដ្ឋសមាជិកអាស៊ានជាច្រើនដែលគាំទ្រគំនិតនេះ មុនពេលដែលអាចពង្រីកបន្ថែមទៀត។

លោកបានបន្ថែមថា យន្តការនេះអាចអនុញ្ញាតឱ្យប្រទេសអាស៊ានចែករំលែកការចូលប្រើប្រាស់ទុនបម្រុងប្រេងយុទ្ធសាស្ត្រ ខណៈដែលវាក៏លើកទឹកចិត្តដល់ការវិនិយោគកាន់តែច្រើនទៅក្នុងវិស័យថាមពលក្នុងតំបន់នាពេលអនាគតផងដែរ៕

ដោយ៖ យា ចិន្ដាខន្ដី (ប្រភព៖ VNA)