AKP ភ្នំពេញ ថ្ងៃទី១១ ខែឧសភា ឆ្នាំ២០២៦ -- នៅពេលដែលមេដឹកនាំតំបន់បានកោះប្រជុំសម្រាប់កិច្ចប្រជុំកំពូលអាស៊ានឆ្នាំ២០២៦ នៅទីក្រុងសេប៊ូទិន្នន័យពាណិជ្ជកម្មថ្មីបានបង្ហាញថា ប្រទេសហ្វីលីពីនរក្សាបាននូវឱនភាពពាណិជ្ជកម្មធំបំផុតនៅអាស៊ីអាគ្នេយ៍ចាប់ពីឆ្នាំ២០១៥ ដល់ឆ្នាំ២០២៤។ យោងតាមការវិភាគរបស់លោកវេជ្ជបណ្ឌិត អាលីកូ ប៉ាណាអូ (Alicor Panao) មកពីសាកលវិទ្យាល័យហ្វីលីពីន បានឱ្យដឹងថា គម្លាតនេះបានពង្រីកយ៉ាងខ្លាំងពី៨,៥ប៊ីលានដុល្លារអាម៉េរិកដល់ ២៦,៨ប៊ីលានដុល្លារអាម៉េរិកក្នុងរយៈពេលមួយទសវត្សរ៍នោះ។ ខណៈដែលតួលេខថ្មីៗបានបង្ហាញពីការកើនឡើងនៃការនាំចេញ ការកើនឡើងយ៉ាងខ្លាំងនៃការនាំចូលបានជំរុញឱនភាពប្រចាំខែដល់កម្រិតខ្ពស់បំផុតក្នុងរយៈពេលប្រាំមួយខែនេះ គឺ ៤,៥ប៊ីលានដុល្លារអាម៉េរិកនៅក្នុងខែមីនា។

គម្លាតកាន់តែធំនេះបង្ហាញពីភាពទន់ខ្សោយនៃរចនាសម្ព័ន្ធនៅក្នុងសេដ្ឋកិច្ចហ្វីលីពីន ជាពិសេសការពឹងផ្អែកយ៉ាងខ្លាំងទៅលើប្រេងឥន្ធនៈនាំចូល អាហារ និងទំនិញមធ្យម។ មិនដូចប្រទេសជិតខាងក្នុងតំបន់មួយចំនួនទៀត ប្រទេសហ្វីលីពីនបានតស៊ូដើម្បីផ្លាស់ប្តូរទៅរកការនាំចេញផលិតកម្មដែលមានតម្លៃខ្ពស់។ បើទោះបីជាប្រាក់បញ្ញើពីពលករនៅក្រៅប្រទេសផ្តល់នូវផ្នែកហិរញ្ញវត្ថុក៏ដោយ ក៏ពួកគេភាគច្រើនជំរុញការប្រើប្រាស់ក្នុងស្រុកនិងជួយបង់ថ្លៃសម្រាប់ការនាំចូលជាជាងដោះស្រាយមូលហេតុចម្បងនៃការពឹងផ្អែកលើពាណិជ្ជកម្ម។

ដើម្បីកាត់បន្ថយហានិភ័យទាំងនេះ និងបង្កើនភាពប្រកួតប្រជែងក្នុងតំបន់ អ្នកជំនាញបានណែនាំថា ប្រទេសហ្វីលីពីនត្រូវតែធ្វើទំនើបកម្មវិស័យកសិកម្មរបស់ខ្លួន និងពង្រីកផលិតកម្មក្នុងស្រុក។ ការកាត់បន្ថយឱនភាពនឹងតម្រូវឱ្យមានការផ្លាស់ប្តូរជាយុទ្ធសាស្ត្រទៅក្នុងការផលិតដែលមានតម្លៃខ្ពស់និងការធ្វើសមាហរណកម្មកាន់តែស៊ីជម្រៅទៅក្នុងខ្សែសង្វាក់ផ្គត់ផ្គង់អាស៊ាន។ លើសពីនេះ ការពន្លឿនការវិនិយោគលើហេដ្ឋារចនាសម្ព័ន្ធថាមពលក្នុងស្រុកត្រូវបានគេមើលឃើញថា ជាជំហានដ៏សំខាន់មួយដើម្បីកាត់បន្ថយភាពងាយរងគ្រោះរបស់សេដ្ឋកិច្ចចំពោះការប្រែប្រួលតម្លៃជាសកលដែលបណ្តាលមកពីជម្លោះអន្តរជាតិ៕

ដោយ៖ យា ចិន្ដាខន្ដី (ប្រភព៖ VNA)