AKP កំពង់ស្ពឺ ថ្ងៃទី៣០ ខែកក្កដា ឆ្នាំ២០២៥-- ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកជំទាវ  កាលពីរសៀលថ្ងៃទី២៩ ខែកក្កដា ឆ្នាំ២០២៥ បានដឹកនាំគណៈប្រតិភូ មន្ត្រីរាជការនៃរដ្ឋបាលខេត្ត និងសប្បុរសជននាំយកអំណោយដែលកើតចេញពីទឹកចិត្តរបស់បងប្អូនប្រជាពលរដ្ឋទូទាំងខេត្តកំពង់ស្ពឺ យកទៅផ្ដល់ជូនដល់បងប្អូនខ្មែរភៀសសឹកដែលកំពុងនៅទីទួលនៅតំបន់មានសុវត្ថិភាព ក្នុងស្រុកវាលវែង ខេត្តពោធិ៍សាត់ ក្នុងនោះមានឃីតចំនួន១០០០កញ្ចប់ ចែកជូនចំនួន២ទីតាំង ស្មើនឹងចំនួន៧០០គ្រូសារ សល់៣០០កញ្ចប់ទៀត ជូនឯកឧត្តមអភិបាលខេត្តពោធិ៍សាត់ជូនដល់កងទ័ពជួរមុខបន្ត។

‎ឆ្លៀតក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានមានប្រសាសន៍ថា បងប្អូនប្រជាពលរដ្ឋក្នុងខេត្តកំពង់ស្ពឺបាននាំគ្នាចូលរួមចំណែកចូលជារួមជាថវិកា និងសម្ភារមកផ្ដល់ជូនតាមរយៈរដ្ឋបាលខេត្ត ដើម្បីយកបន្តទៅផ្ដល់ជូនដល់បងប្អូនខ្មែរភៀសសឹក ដែលកំពុងនៅទីទួលនៅតំបន់មានសុវត្ថិភាព ហើយវីរកងទ័ពនៅសមរភូមិជួរមុខដែលកំពុងតែប្រយុទ្ធ ឯកឧត្តមបានសម្តែងការអរគុណចំពោះមន្ត្រីរាជការ ជាពិសេសបងប្អូនប្រជាពលរដ្ឋក្នុងខេត្តកំពង់ស្ពឺ ដែលមានទឹកចិត្តស្នេហាជាតិដោយបានចំណាយធនធានផ្ទាល់ខ្លួនទាំងថវិកា និងសម្ភារ ស្បៀងអាហារដល់បងប្អូនជនភៀសសឹក ដែលជាទឹកចិត្តស្នេហាជាតិរបស់បងប្អូនប្រជាពលរដ្ឋគឺជាកម្លាំងចិត្តដ៏មោះមុតចំពោះរាជរដ្ឋាភិបាល ជាពិសេសបងប្អូនកងកម្លាំងប្រដាប់អាវុធដែលកំពុងតស៊ូប្រយុទ្ធនៅសមរភូមិ ហើយយើងទាំងអស់គ្នាសូមបួងសួងដល់ទេវតាជួយបីបាច់ថែរក្សាដល់បងប្អូនកងទ័ពនៅសមរភូមិជួរមុខឱ្យទទួលជ័យជម្នះលើសត្រូវ និងការពារបូរណភាពទឹកដីរបស់កម្ពុជាឱ្យបានរុងរឿងទៅមុខទៀត៕ 

ដោយ លឹម សាន្ត