AKPតាកែវ ថ្ងៃទី០៩ខែឧសភា ឆ្នាំ២០២៦ -- អាជ្ញាធរខេត្តតាកែវ កំពុងពិនិត្យនិងសិក្សាយ៉ាងហ្មត់ចត់ លើគម្រោងស្នើសុំអភិវឌ្ឍន៍តំបន់កសិទេសចរណ៍ និងរមណីយដ្ឋានកែច្នៃ នៅផ្នែកខាងកើតភ្នំជីសូរ្យស្ថិតនៅក្នុងស្រុកសំរោងខេត្តតាកែវ លើផ្ទៃដីជិត២០០ហិកតា ដែលគ្រោងនឹងប្រើប្រាស់ទុនវិនិយោគក្នុងឆ្នាំដំបូងជាង 2លានដុល្លារអាមេរិក។កិច្ចប្រជុំនេះរៀបចំឡើងនៅសាលប្រជុំតូចរដ្ឋបាលខេត្តតាកែវ កាលពីថ្ងៃទី០៨ខែឧសភាឆ្នាំ២០២៦។អញ្ជើញជាអធិបតីក្នុងពិធីនោះដោយ លោក ញ៉ែម ស្រស់ អភិបាលរងនៃគណៈអភិបាល ខេត្តតាកែវ ព្រមទាំងមានការអញ្ជើញចូលរួម ដោយលោកប្រធាន អនុប្រធានមន្ទីរអង្គភាពពាក់ព័ន្ធ អាជ្ញាធរស្រុកសំរោង មន្ត្រីរាជការ និងកងកម្លាំងប្រដាប់អាវុធ ចូលរួមជាច្រើនរូបផងដែរ។

    
យោងតាមកិច្ចប្រជុំនេះ លោក ញ៉ែម ស្រស់ អភិបាលរងនៃគណៈអភិបាល ខេត្តតាកែវ រួមជាមួយមន្ទីរជំនាញ និងអាជ្ញាធរមូលដ្ឋាន បានពិភាក្សាលើសំណើវិនិយោគរបស់ក្រុមហ៊ុនចំនួនពីរ ដែលតំណាងដោយ លោក សុខ វាសនា និងលោក ជា បូរិទ្ធ ក្នុងគោលបំណងដើម្បីប្រែក្លាយតំបន់ជុំវិញភ្នំជីសូរ្យ ឱ្យទៅជាគោលដៅទេស ចរណ៍ចម្រុះ ដ៏មានសក្តានុពល។

    
ក្នុងកិច្ចប្រជុំនោះ លោកអភិបាលរងខេត្តតាកែវ ក៏បានផ្តល់ការណែនាំសំខាន់ៗដល់មន្ត្រីជំនាញនិងក្រុមហ៊ុន ត្រូវបង្កើនកិច្ចសហការជិតស្និទ្ធជាមួយគ្នា ដោយត្រូវសហការជាមួយក្រុមហ៊ុន និងអាជ្ញាធរមូលដ្ឋានស្រុកសំរោង ដើម្បីសិក្សាលម្អិតពីផលប៉ះពាល់នានា។ត្រូវធានាឱ្យបានដាច់ ខាតថា ការអភិវឌ្ឍនេះមិនប៉ះពាល់ដល់តំបន់អភិរក្សប្រាសាទភ្នំជីសូរ្យ ដែលជាសម្បត្តិបេតិកភណ្ឌជាតិ ដ៏មានតម្លៃនោះឡើយ។ ហើយគម្រោងនេះត្រូវរៀបចំឱ្យមានភាពស៊ីចង្វាក់គ្នា រវាងរមណីយដ្ឋានវប្បធម៌ប្រវត្តិសាស្ត្រ (ប្រាសាទបុរាណ) និងរមណីយដ្ឋានកែច្នៃបែបទំនើប។ដើម្បីលើកកម្ពស់សក្តានុពលទេសចរណ៍ ក្នុងតំបន់ឱ្យកាន់តែរីកចម្រើន។

    
តាមការបញ្ជាក់ពីតំណាងក្រុមហ៊ុន ទីតាំងដែលបានស្នើសុំអភិវឌ្ឍន៍នេះ ស្ថិតនៅផ្នែកខាងកើតភ្នំជីសូរ្យ ដែលមិនប៉ះពាល់ដល់តំបន់ហាមឃាត់ របស់មន្ទីរវប្បធម៌និងវិចិត្រសិល្បៈខេត្តតាកែវឡើយ។ក្នុងនោះចំណុចដែលសំខាន់ៗនៃគម្រោងអភិវឌ្ឍន៍ គឺបានបោះទុនវិនិយោគប្រមាណជាង2លានដុល្លារសហរដ្ឋអាមេរិក សម្រាប់ដំណាក់កាលឆ្នាំទី១ នៅទីតាំងផ្នែកខាងកើតភ្នំជីសូរ្យ នៃស្រុកសំរោងខេត្តតាកែវ លើផ្ទៃដីជិត200ហិកតា។ហើយនៅថ្ងៃខាងមុខវានឹងក្លាយជាផ្នែកមួយយ៉ាងសំខាន់ ក្នុងការជួយលើកសម្រស់រមណីយដ្ឋានភ្នំជីសូរ្យឱ្យកាន់តែមានភាពទាក់ទាញខ្លាំងជាងមុន និងបានជួយបង្កើតការងារជូនប្រជាពលរដ្ឋក្នុងមូលដ្ឋាន និងចូលរួមថែរក្សាធនធានធម្មជាតិថែមទៀតផង៕

ដោយ៖អ៊ុច សៀង