AKP កំពង់ធំថ្ងៃទី១ ខែកញ្ញា ឆ្នាំ២០២៥--ឧកញ៉ាសាស្ត្រាចារ្យសមូហកបណ្ឌិត ឡី សុភាពសមាជិកគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធនិងជាប្រធានសមាគមសហព័ន្ធយុវជនសេដ្ឋកិច្ចកម្ពុជាបានថ្លែងថាការអប់រំល្អគឺជាកូនសោសម្រាប់ដោះស្រាយបញ្ហាសង្គមនិងសេដ្ឋកិច្ចជាតិ។ឧកញ៉ាសាស្ត្រាចារ្យសមូហកបណ្ឌិតថ្លែងយ៉ាងដូច្នេះក្នុងពិធីប្រគល់វិញ្ញាបនបត្រនិងប័ណ្ណសរសើរដល់សិស្សានុសិស្សឆ្នើមនៃសាលាគ្រាប់ពូជល្អឆ្នាំសិក្សា២០២៤-២០២៥ ជិត៨០០នាក់នៅភោជនីយដ្ឋាន ឡូវ គឹម សេង សង្កាត់ដំរីជាន់ខ្លាក្រុងស្ទឹងសែនខេត្តកំពង់ធំកាលពីថ្ងៃទី៣១ខែសីហាឆ្នាំ២០២៥។

ឧកញ៉ាសាស្ត្រាចារ្យសមូហកបណ្ឌិត ឡី សុភាពបានបញ្ជាក់ថាមូលធនមនុស្សប្រកបដោយចំណេះដឹង ចំណេះធ្វើគុណធម៌ និងសុខភាពល្អមាំមួន រាជរដ្ឋាភិបាលកម្ពុជាបានដាក់ចេញនូវវិធានការគន្លឹះចំនួន៥ក្នុងនោះមានវិធានការគន្លឹះក្នុងវិស័យអប់រំដែលជាគោលដៅលើកម្ពស់គុណភាពអប់រំ ដោយសំដៅលើកកម្ពស់គុណភាពអប់រំ ក្នុងការពង្រឹងអភិបាលកិច្ចល្អការត្រួតពិនិត្យកែលម្អនិងកម្មវិធីសិក្សានិងសកម្មភាពក្រៅម៉ោងសិក្សាឱ្យស្របទៅតាមការពង្រឹងចំណេះដឹង វិន័យសិលធម៌ និងឥរិយាបថរបស់សិស្ស ការយកចិត្តទុកដាក់លើសុខុមាលភាពសិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀនការជំរុញលើកទឹកចិត្តការចូលរួមរបស់មាតាបិតា អាណាព្យាបាលនិងសហគមន៍ក្នុងការអប់រំស្របពាក្យប្លោក"ភាពជាដៃគូរដ្ឋនិងសហគមន៍ដើម្បីការអប់រំ"។

រាជរដ្ឋាភិបាលកម្ពុជាបានបន្តយកចិត្តទុកដាក់ខ្ពស់លើវិស័យអប់រំ តាមរយៈការរិះរកវិធានការ និងយុទ្ធសាស្ត្របន្ថែមទៀត ដោយធ្វើយ៉ាងណាឱ្យសាលារៀន ក្លាយជាអង្គភាពផ្ដល់សេវាសាធារណៈដែលមានប្រសិទ្ធភាពខ្ពស់អភិបាលកិច្ចល្អនិងមានគណនីយភាពជាមួយនឹងប្រជាជន និងសហគមន៍។ដូច្នេះសាលារៀនត្រូវអនុវត្តតួនាទីប្រកបដោយការទទួលខុសត្រូវខ្ពស់ពិសេសសកម្មភាពបង្រៀននិងរៀនដែលនាំទៅរកការប្រែប្រួលជាវិជ្ជមាននៃលទ្ធផលការសិក្សា របស់សិស្សប្រកបដោយវិន័យ សីលធម៌ គុណធម៌និងឥរិយាបទថ្លៃថ្នូរ សាកសមជាកុលបុត្រកុលធីតានិងជាទំពាំងស្នងឬស្សីរបស់ជាតិ។

លោក ខាត់ សុខអេង នាយកសាលាគ្រាប់ពូជល្អបានបញ្ជាក់ថា សាលារៀនគ្រាប់ពូជល្អបង្កើតឡើងចាប់ផ្តើមពីថ្ងៃទី០៧ខែមិនា ឆ្នាំ២០១៧ ដែលមានសិស្សប្រមាណ២០នាក់និងគ្រូតែ ៣នាក់ តែប៉ុណ្ណោះ។ ហើយរហូតមកដល់ឆ្នាំសិក្សា ២០២៤-២០២៥ នេះ មានសិស្សសរុបចំនួន៨២៨នាក់ ស្រី៣៤៣នាក់។សាលាគ្រាប់ពូជល្អក៏នូវមានអគារសិក្សាថ្មីដ៏រឹងមាំ មានបន្ទប់សិក្សាធំលាយ បំពាក់ដោយបរិក្ខាទំនើបៗដូចជា ម៉ាស៊ីនត្រជាក់កង្ការ ពន្លឺចេញចូលគ្រប់គ្រាន់ ការតុបតែងតាមថ្នាក់នីមួយៗស្របតាមកម្រិតយល់ដឹងរបស់ សិស្ស។

លោកនាយកសាលាបានថ្លែងអំណរគុណ ដល់មាតាបិតា អាណាព្យាបាល ដែលមានទំនុកចិត្ត បញ្ជូនកូនមកសិក្សានៅសាលាគ្រាប់ពូជល្អ។ ចំពោះសិស្សដែរទទួលបានវិញ្ញាបនបត្រនៅថ្ងៃនេះ មានសិស្សសរុបចំនួន៤២៩នាក់សំរាប់តែសិស្សបញ្ចប់ថ្នាក់មត្តេយ្យកម្រិតខ្ពស់ ថ្នាក់ទី៣ថ្នាក់ទី៦ទាំងកម្មវីធីភាសាខ្មែរនិងកម្មវិធីភាសាអង់គ្លេសព្រមទាំងសិស្សឆ្នើមប្រចាំឆ្នាំគ្រប់កម្រិត៕

ដោយ៖ ស៊ុម វណ្ណា