AKP បន្ទាយមានជ័យ ថ្ងៃទី១០ ខែឧសភា ឆ្នាំ២០២៦ -- ក្នុងវិធានការឆ្លើយតបយ៉ាងម៉ឺងម៉ាត់ចំពោះបទល្មើសឆ្លងដែនតាមប្រព័ន្ធឌីជីថល ថ្នាក់ដឹកនាំជាន់ខ្ពស់នៃរាជរដ្ឋាភិបាល បានប្រកាសដាក់ចេញនូវបទបញ្ជា "ក្តៅ" ដើម្បីបោសសម្អាតរាល់ការឆបោកតាមប្រព័ន្ធបច្ចេកវិទ្យា (Online Scams) ឱ្យអស់ពីទឹកដីខេត្តបន្ទាយមានជ័យ ដោយចាត់ទុកបញ្ហានេះជា "អាទិភាពសន្តិសុខជាតិ" ដែលមិនអាចមើលរំលងបាន។

នាព្រឹកថ្ងៃទី១០ ខែឧសភា ឆ្នាំ២០២៦ នេះនៅសាលប្រជុំសាលាខេត្តបន្ទាយមានជ័យ ឯកឧត្តម នាយឧត្តមសេនីយ៍ ជួន សុវណ្ណរដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានលេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា បានអញ្ជើញជាអធិបតីក្នុងកិច្ចប្រជុំយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា ដោយមានការចូលរួមពី ឯកឧត្តម អ៊ុំ រាត្រីអភិបាលនៃគណៈអភិបាលខេត្តបន្ទាយមានជ័យ ព្រមទាំងថ្នាក់ដឹកនាំកងកម្លាំងប្រដាប់អាវុធទាំងបីប្រភេទ និងអាជ្ញាធរក្រុង-ស្រុកទូទាំងខេត្ត។

ក្នុងមតិដឹកនាំយ៉ាងម៉ឺងម៉ាត់ ឯកឧត្តម នាយឧត្តមសេនីយ៍ ជួន សុវណ្ណ បានសង្កត់ធ្ងន់ថា Online Scams មិនមែនគ្រាន់តែជាការបោកប្រាស់ទឹកប្រាក់បន្តិចបន្តួចនោះទេ ប៉ុន្តែវាគឺជាទម្រង់នៃឧក្រិដ្ឋកម្មរៀបចំចាត់តាំង ដែលប៉ះពាល់ដល់សន្តិសុខកម្រិតជាតិ និងអន្តរជាតិ។ "យើងត្រូវតែបន្តនិរន្តរភាពនៃយុទ្ធនាការនេះឱ្យកាន់តែខ្លាំងក្លា និងស៊ីជម្រៅបំផុត ដើម្បីកុំឱ្យក្រុមឧក្រិដ្ឋជនមានឱកាសប្រើប្រាស់ទឹកដីរបស់យើងធ្វើជាបង្អែកក្នុងការប្រព្រឹត្តបទល្មើស។ ការបង្ក្រាបត្រូវធ្វើឡើងដោយគ្មានការលើកលែង ហើយការអប់រំប្រជាពលរដ្ឋគឺជាខែលការពារដ៏រឹងមាំបំផុត"។ នេះជាការបញ្ជាក់បន្ថែមរបស់ឯកឧត្តម នាយឧត្តមសេនីយ៍។

ជាការឆ្លើយតប ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានបង្ហាញនូវឆន្ទៈយ៉ាងមុតមាំក្នុងការគាំទ្រផែនការយុទ្ធសាស្ត្ររបស់រាជរដ្ឋាភិបាល។ ដោយសារខេត្តបន្ទាយមានជ័យជាតំបន់សេដ្ឋកិច្ចជាប់ព្រំដែនដែលមានដង្ហើមពាណិជ្ជកម្មមមាញឹក ឯកឧត្តមបានព្រមានថា នេះអាចជាគោលដៅដែលក្រុមឧក្រិដ្ឋជនឆ្លៀតឱកាសបង្កប់ខ្លួន ប្រសិនបើអាជ្ញាធរមានការធ្វេសប្រហែស។

ដើម្បីអនុវត្តយុទ្ធនាការនេះឱ្យមានប្រសិទ្ធភាព ឯកឧត្តមអភិបាលខេត្តបានដាក់ចេញនូវកិច្ចការចំពោះមុខអាជ្ញាធរចាប់ពីកម្រិតខេត្ត រហូតដល់ប៉ុស្តិ៍នគរបាលរដ្ឋបាល ត្រូវតាមដានរាល់ទីតាំងសង្ស័យដែលមានបង្កប់ល្បែងស៊ីសង ឬការឆបោកអនឡាញ។ បង្កើនការផ្សព្វផ្សាយកុំឱ្យពលរដ្ឋចាញ់បោកការអូសទាញការងារដែលផ្ដល់ប្រាក់ខែខ្ពស់ខុសធម្មតា ឬការវិនិយោគអនឡាញដែលគ្មានប្រភពច្បាស់លាស់។ ពង្រឹងកិច្ចសហការរវាងកងកម្លាំង និងស្ថាប័នតុលាការ ដើម្បីអនុវត្តច្បាប់ឱ្យបានតឹងរ៉ឹងបំផុតលើជនល្មើស។

កិច្ចប្រជុំទទួលបានលទ្ធផលផ្លែផ្កា និងការប្តេជ្ញាចិត្តខ្ពស់។ យុទ្ធនាការដែលចាប់ផ្ដើមចេញពីខេត្តបន្ទាយមានជ័យនាពេលនេះ ត្រូវបានគេមើលឃើញថា មិនត្រឹមតែជាការបោសសម្អាតបទល្មើសប៉ុណ្ណោះទេ ប៉ុន្តែគឺជាការកសាង "ទំនុកចិត្ត" ដល់អ្នកវិនិយោគទុនបរទេស និងធានានូវសុវត្ថិភាពផ្លូវចិត្តជូនដល់ប្រជាពលរដ្ឋក្នុងយុគសម័យសេដ្ឋកិច្ចឌីជីថល។

តាមរយៈការដាក់ចេញនូវវិធានការក្ដៅនាថ្ងៃនេះ ខេត្តបន្ទាយមានជ័យបានក្លាយជាសមរភូមិដ៏រឹងមាំមួយ ក្នុងការកម្ចាត់ឧក្រិដ្ឋកម្មបច្ចេកវិទ្យា ដើម្បីធានាបាននូវសន្តិសុខ និងការអភិវឌ្ឍប្រកបដោយចីរភាពសម្រាប់ជាតិមាតុភូមិទាំងមូល៕

ដោយ ឈុន សារ៉ាត