AKP កំពង់ចាម ថ្ងៃទី០៣ ខែតុលា ឆ្នាំ២០២៥-- ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានលើកឡើងថា ការសាងសង់នៅកំពង់ផែទេសចរណ៍ខេត្តកំពង់ចាមនឹងជាហេដ្ឋានុបវន្ត និងកាលានុវត្តភាពដ៏សំខាន់ក្នុងការស្រូបទាញភ្ញៀវទេសចរមកកាន់តែច្រើនមកកាន់ខេត្តកំពង់ចាមដ៏ស្រស់បំព្រង និងមានការអភិវឌ្ឍរីកចម្រើនលើគ្រប់វិស័យពិសេសជួយ ក្នុងការគាំទ្រនិងទ្រទ្រង់ ដល់វិស័យឈាមរបស់សេដ្ឋកិច្ចជាតិថ្មីថែមទៀតក្នុងវិស័យទេសចរណ៍ និងផ្តល់ប្រយោជន៍ដោយផ្ទាល់ដល់ប្រជាពលរដ្ឋ និងជួយសម្រួលដល់ការធ្វើដំណើរ បង្កើនការទាក់ទាញភ្ញៀវទេសចរជាតិ និងអន្តរជាតិ បង្កើនការទាក់ទាញការវិនិយោគ បង្កើនការងារ ការលើកកម្ពស់កំណើនជីវភាពរស់នៅរបស់ប្រជាពលរដ្ឋ ពិសេសការតភ្ជាប់ ការរៀបចំជាកញ្ចប់ ដំណើរទស្សនកិច្ចភ្ញៀវទេសចរជាតិ និងអន្តរជាតិនៅតាមផែនៃដងទន្លេមេគង្គកម្ពុជាយើងហើយក៏ជាការធានាសម្រួលដល់ប្រព័ន្ធគមនាគមន៍ជាតិ ដ៏សំខាន់មួយទៀត ក្នុងការស្រូបទាញទេសចរជាតិ-អន្តរជាតិ។

ឯកឧត្តមរដ្ឋមន្ត្រីបានលើកឡើងយ៉ាងដូច្នេះក្នុងឱកាសដែលឯកឧត្តម និងឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញជាអធិបតីក្នុងពិធីបើកការដ្ឋានសាងសង់កំពង់ផែទេសចរណ៍កំពង់ចាមនៅព្រឹកថ្ងៃទី០៣ ខែតុលា ឆ្នាំ២០២៥ ក្នុងក្រុងកំពង់ចាម ដោយមានការចូលរួមពីឯកឧត្តម ខ្លូត ផន ប្រធានក្រុមប្រឹក្សាខេត្ត ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្ដមអភិបាលខេត្តត្បូងឃ្មុំ និងព្រៃវែង ថ្នាក់ដឹកនាំក្រសួង ព្រមទាំងមន្រ្តីរាជការជាច្រើនរូបទៀត។

ឯកឧត្តម ហួត ហាក់  បានបន្ថែមថា គម្រោងកំពង់ផែទេសចរណ៍នេះនឹងដើរតួនាទីសម្រាប់តភ្ជាប់ការដឹកជញ្ជូនភ្ញៀវទេសចរនៅក្នុងស្រុក តាមតំបន់ទន្លេមេគង្គលើ រហូតទៅខេត្តក្រចេះជាដើម និងការដឹកជញ្ជូនភ្ញៀវទេសចរអន្តរជាតិ ដែលធ្វើដំណើរតាមទន្លេមេគង្គពីប្រទេសវៀតណាមទៅ-មក រាជធានីភ្នំពេញ និងបន្តមកលេងកម្សាន្តនៅខេត្តកំពង់ចាម និងខេត្តក្រចេះ ក៏ដូចជាតំបន់ជុំវិញដែលមានសក្តានុពល និងតភ្ជាប់ការដឹកជញ្ជូនតាមព្រែកជីកហ្វូណនតេជោ។ គម្រោងកំពង់ផែទេសចរណ៍នេះ គឺជាគម្រោងមួយមានសក្តានុពលដែលនឹងចូលរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងលើកកម្ពស់សោភ័ណភាព គុណភាពនៃការរស់នៅបែបស៊ីវិល័យរបស់ប្រជាពលរដ្ឋក្នុងក្រុងកំពង់ចាមផងដែរ។ បើនិយាយពីរឿងទេសចរណ៍គឺគេនិយាយអំពីការធ្វើដំណើរ ការស្នាក់នៅ ការហូបចុក និងដំណើរកម្សាន្ត ពិសេសគឺដំណើរទស្សនកិច្ចកម្សាន្តរបស់ភ្ញៀវទេសចរណ៍ដោយមានការចំណារ។ វិស័យទេសចរណ៍មានការប្រទាក់ក្រឡាច្រើននូវរូបវន្តតភ្ជាប់ដូចជា ផ្លូវ ស្ពាននិងកំពង់ផែ ដែលបានរួមចំណែកយ៉ាងសកម្មនិងជាតម្លៃបន្ថែមខ្ពស់ក្នុងការលើកកម្ពស់វិស័យទេសចរណ៍។ គម្រោងស្ថាបនាសាងសង់កំពង់ផែទេសចរណ៍ក្រុងកំពង់ចាម គឺជាការសម្រួលតភ្ជាប់ការធ្វើដំណើរ ការដឹកជញ្ជូន ប្រកបដោយភាពប្រទាក់ក្រឡានូវកាលានុវត្តភាពថ្មីមួយថែមទៀត ក្នុងការទាក់ទាញក៏ដូចជា ជំរុញភ្ញៀវទេសចរជាតិ និងអន្តរជាតិដែលធ្វើដំណើរមកកាន់ខេត្តកំពង់ចាម និងដោយនិយាយជារួមការធ្វើដំណើរមកកាន់ប្រទេសកម្ពុជាយើងតាមផ្លូវទឹកកាន់តែច្រើនថែមទៀត។

ឯកឧត្តមបានបន្ថែមទៀតថា ខេត្តកំពង់ចាមជាខេត្តដែលមានសក្តានុពលទេសចរណ៍ដ៏សម្បូរបែប ដោយខេត្តមានរមណីយដ្ឋានទេសចរណ៍ជាច្រើនដូចជា ទេសចរណ៍វប្បធម៌ប្រវត្តិសាស្ត្រ ទេសចរណ៍ធម្មជាតិ  កសិទេសចរណ៍  អេកូទេសចរណ៍ និងទេសចរណ៍កែច្នៃ។ ខេត្តមានរមណីយដ្ឋានទេសចរណ៍១១កន្លែង ក្នុងនោះរមណីយដ្ឋានទេសចរណ៍វប្បធម៌និងប្រវត្តិសាស្ត្រមាន៤កន្លែង កសិទេសចរណ៍ និងសហគមន៍ទេសចរណ៍មាន៥កន្លែង និងរមណីយដ្ឋានទេសចរណ៍កែច្នៃចំនួន២កន្លែងផងដែរ។ ចំពោះអាជីវកម្មទេសចរណ៍ខេត្តមានសណ្ឋាគារចំនួន១៩កន្លែងមាន៨៥០បន្ទប់ ផ្ទះភ្ញៀវមានចំនួន១០៤កន្លែងមានជា៥ម៉ឺនបន្ទប់ និងភោជនីយដ្ឋានចំនួន៣១កន្លែង និងអាហារដ្ឋាន៨២កន្លែងដែលអាចបម្រើសេវាកម្មភ្ញៀវបានតាមតម្រូវការ។

គួរបញ្ជាក់ថា កំពង់ផែទេសចរណ៍កំពង់ចាមមានទីតាំងស្ថិតនៅភូមិទី៣ សង្កាត់វាលវង់ ក្រុងកំពង់ចាម ខេត្តកំពង់ចាម ស្ថិតនៅទីតាំងទីលានចំណតកំពង់ចម្លងចាស់។ គម្រោងសាងសង់ដំណាក់កាលទី១នេះនឹងប្រើប្រាស់រយៈពេល២៤ខែ។ ជាមួយគ្នានេះដែរ ការសាងសង់ហេដ្ឋារចនាសម្ព័ន្ធដំណាក់កាលទី២ រួមមានអគាររដ្ឋបាល និងកន្លែងរង់ចាំសម្រាប់ភ្ញៀវទេសចរនឹងចាប់ផ្តើមនៅឆ្នាំ២០២៦៕

ដោយ ឆាយ ម៉ុត